Barcelona an tlawm

La Liga hmahruaitu Barcelona dinhmun a derthawng - Catalan club hian a club kum 125-na an lawm zanah Las Palmas an ngam lo a, 2-1 in an tlawm!

Barca khelmualah mikhual team tan Catalan club striker hlui Sandro Ramírez chuan goal hmahruai a khung a, captain Raphinha chuan si phurh hi sut mah se, Wolverhampton Wanderers aṭanga loan-a an hawh Fabio Silva chuan chakna goal a khung zui.

Las Palmas tan September 1971 hnua Barca laka an chak hmasak ber a ni a, Barcelona tan tun season-a an vawi thum tlawmna a ni - Raphinha, Ferran Torres leh Pablo Torre hmangin Barca hian chance dang nei mah se, an chhawr lo.

Barca tlawm zanah Atletico Madrid chuan 5-0 ngawtin Real Valladolid an sawp a, Clement Lenglet, Julian Alvarez, Rodrigo De Paul, Antoine Griezmann leh Alexander Sørloth ten goal khat ṭheuh an khung a, point hnih chiahin Barca an thlau tawh.

Real Madrid chu nizan khan inlanin, an result kan hre hman lo. Barca aia match hniha khel tlemin, an chak ve ve chuan, khelh zat inangah point hnihin Barca an tlanpel ang.