A vawi khat nan Botafogo an champion

Botafogo club hi kum 123 teh meuha upa an ni a, an club din tirh aṭanga a vawi khat nan Copa Libertadores title an la ta, nomawi chawi tur hian anmahni ang bawka Brazilian club Atletico Mineiro chu 3-1 in an hneh.

Nimin zing khan Buenos Aires khawpuia khelmual hmingthang tak pakhat Estadio Monumental-ah final hi khelh a ni a, minute hnihna lekah Botafogo midfielder Gregore chu hnawhchhuah a ni.

Player kim lo ni mah se Botafogo hian chawlhlawk hmain Luiz Henrique leh Alex Telles te hmangin goal an nei hmasa a, second half tirah Eduardo Vargas chuan Mineiro tan si phurh a sut ṭhen.

Botafogo an ṭang rei thei hle a, hun tawp dawn thlenga an goal an ven zui theih bakah Junior Santos chuan an goal thumna a khung leh ta zawk a, tun hma lama an la dai ngai loh ram an dai ta a ni.

Copa Libertadores hi South American rama football club hrang hrang inelna a ni a, kum 1960 aṭanga an khelh ṭan tawh kha niin Argentina club Independiente (7 titles) chu champion tam ber an ni.