Kolkata club an chak

Kartawp Indian Super League inkhelah East Bengal leh Mohun Bagan an inlan a, Kolkata club pahnih hi an chak ve ve. East Bengal hian Zirtawpni zan khan NorthEast United chu 1-0 in an hneh a, Dimitrios Diamantakos chuan inkhela goal awmchhun hi a khung.

East Bengal tan Lalchungnunga'n inkhel bul ṭan mah se, minute 87-naah a yellow card pahnihna avangin hnawhchhuah a ni. Inrinni zan khan Mohun Bagan inlan ve lehin, Chennaiyin chu Jason Cummings-a goal hmangin, 1-0 in an hneh.

Bagan tan Lalengmawia Ralte (Apuia) a khel tluan a, Chennaiyin tan PC Laldinpuia leh Lalrinliana Hnamte ten bul an ṭan ve bawk.

Inrinni zan inkhel hmasa zawkah Mumbai City-in hnehna an chang a, Mehtab Singh-a goal hmangin Hyderabad chu 1-0 in an hneh - goal hi captain Lallianzuala Chhangte siamsak a ni.

Mumbai tan Lianzuala bakah Hmingthanmawia Ralte (Valpuia) chuan inkhel bul a ṭan a, Hyderabad tan keeper Lalbiakhlua Jongte leh forward Ramhlunchhunga ten inkhel bul an ṭan.