Premier League nomawi la ula, Liverpool pe rawh u!

Liverpool-in Premier League nomawi chawi an tumna kawngah harsatna an tawk lo - Pathianni zan khan Anfield-ah team talbuai Manchester City an mikhual a, Reds hian 2-0 in hnehna an chang.

Arne Slot-a enkawl team tan Cody Gakpo leh Mohamed Salah (penalty) ten goal khat ve ve an khung a, City-in an mikhualna ramah a chhanglettu tur an neih loh avangin an tlawm.

Real Madrid hneh zawhah Liverpool-in City an hneh a, "Fiahin an awm dawn" tia ringhlel taka thlirtute chu result nen an chhang zel - October, November, December pawh ni se buaina a awm lo a, Liverpool an chak zel!

Reds hian league match 13 an khelh aṭanga point 34 hmuin hma an hruai mek a, anmahni hnaih bertu Arsenal aiin point kuain an sang zawk. City phei chuan league nomawi an thlah ta, tiin a sawi ngam a, point 11 ngawta Liverpool thlauin, table-ah pangana an ni.

A goal hma

Anfield-ah Liverpool-in goal khung turin hun an mamawh rei lo. Minute 12-na lekah Mohamed Salah chuan ṭha taka ball a tlan luhpui hnuin Gakpo tan a siamsak a, Dutch striker tan goal-a chantir loh mawi lo khawpa chance duhawm a ni.

City tlarhnung a pherh a, tlarhmaah Erling Haaland chu Virgil van Dijk leh Joe Gomez hmaah a thamral a, midfield-in awmzia a nei lo a, kawng tinrengah Liverpool an chungnung zawk a ni ber mai!

Reds vanneih zan ni ngat se, goal tam zawk khung thei an ni. Mahse, captain VVD-a'n post a tauh per a, a aia 'position' duhawm zawk mah aṭangin uiawm takin a tauh goal lo bawk.

Real Madrid laka goal a khung hnua City laka khungtu Gakpo pawhin goal khat aia tam khung theihna chance a nei a, mahse, a chhawr tlat lo - Trent Alexander-Arnold pawh goal hmaa a ke hmui loh zan a ni.

A hming Salah

Season tawpa Liverpool-a a contract hmang zo tur Salah-a'n Anfield-ah cham a duh tih ṭawngka hmangin a lantir fo a, club thuneituten contract thar an zawrh rih loh thu pawh a sawi fo - Pathianni zan inkhelah fan-ten Salah hi cham tura an duhna banner an keng nasa hle.

Salah hi khelmual pawnah a kam tam satliah lo a, a chhung lamah pawh a theihna a pholang zel. City tan player hnawksak bera chhal ngam a ni a, goal hmahruai a thawhchhuah hnuah goal hnihna chu penalty aṭangin a khung bawk.

Liverpool tan bench aṭanga luhtir, thawkrim em em Darwin Nunez lakah Ruben Dias a chesual a, heta ṭanga ball kal umtu Luis Diaz chu Ederson aia thlan keeper Stefan Ortega chuan a titlu a, penalty a chawi.

Real Madrid laka penalty chhuih lut lo hlim Salah a lo pen chhuak a, kum 32 mi forward hian zam miah loin a khung. Tun season inelna hrang hrangah Salah hian match 20 khelin goal 13 a khung ta a, assist vawi 11 a nei!

Fak rawh u!

Liverpool hian Slot-a enkawlna hnuaiah match 20 an khel tawh a, vawi 18 an chak - vawi khat an tlawm a, vawi khat draw an nei. Premier League-ah hma an hruai a, Champions League match nga khelh tawhah chak vekin, hma an hruai bawk.

Reds hian League Cup-ah quarterfinal an lut tawh bawk. Jurgen Klopp thlaktu Slot-a'n a hna tlin takin a thawk a, Merseyside club-a heti taka season bul ṭan ṭhat hi a beisei bik loh thu a lo sawi tawh.

Season ṭantir lama an chet ṭhat lai khan, "October-ah fixture a hautak dawn alawm" an tihsak a, mahse, Chelsea (2-1), Arsenal (2-2), Brighton & Hove Albion (3-2), RB Leipzig (1-0) te harsatna nei loin an paltlang a, "November-ah en chhin ang" an la ti cheu.

Mahse, November a lo thleng a, team ṭhaa chhal ringawt pawh Aston Villa (2-0), Bayer Leverkusen (4-0), Real Madrid (2-0) leh Manchester City (2-0) an hneh leh vek - "Thlasik khawvawt nghak ang aw..." an ti leh a, Liverpool fan-te erawh hlim taka Krismas ruai ṭheh turin an inbuatsaih tawh e!

Kan khelh dan kha duhthusam deuhthaw a ni a, kan thawhrim dan bik chu duhthusam a tling. Kan chance hlah zozai avangin a tawp lamah a harsa ta deuh a, mahse, hetiang ang match ropui hi chu heti zata a tawp pawh hi a ṭha ve tho e. Kan goal hnihna kha khung hma ta ila, hah erawh a dam deuh ang - kan nawr fo a, mahse, an ṭha em a ni. Ka player-te an thatho em em a, fans pawhin an tiṭha thlawt.

City laka chak tur chuan kawng engkimah chungnun a ngai a, a engti zawng pawhin min tibuai thei reng an ni. Khatiang taka khelh loh kha chuan City hneh theih an ni lo. Kan bul ṭan dan hi a duhawm thlawt a, tumahin hetianga season kan hman hi an beisei kher lo ang.

Jurgen Klopp-a'n team ṭha tak min hnutchhiah a, mahse, chuti chung chung chuan team ṭha heti zozai kan hneh rin hi chu a harsa zawk a ni. Mahse, ka sawi fo angin, Arsenal, Chelsea leh City inkhel ka hmu vek a, heng team-te hian hahdama min awmtir an tum dawn lo - chuvang chuan kan tumah kan chian a, rilru kan pek reng a ngai a ni. - Arne Slot, Liverpool head coach

Inkhel ṭantir lam, minute 15-20 inkar kha an ti ṭha thlawt a, inkhel thunun a, ball inpek tam tum ṭhin mah ila, kan tan chuan a harsa thlawt a ni. Liverpool khan an goal hmasa zawk kha an phu takzet - first half bul kan ṭan ṭha a, second half pawh kan tichhe lo. Mahse, Liverpool kha tlarhma leh a hnungah an ṭha kawp em a ni.

"Liverpool ka lawmpui a, keini pawh kan insiamṭha ang a, 'zero' aṭangin bul kan ṭan leh ang. Kan dinhmun hi awih a harsa zawk hial a, mahse, ka player-te chungah rinna ka nghat lian a, season tawpah kan dinhmun chu kan hria ang chu. - Pep Guardiola, City manager