Bawngkawn dal theitu Zemabawk North

GIG Motors MFA All Mizoram Inter Village Football C'ship 2024-ah Bawngkawn thawm a ring a, Lalrindika Hmar hote hian team ṭha Armed Veng South an hneh hnuah champion turin rin an hlawh lehzual.

Vawiin chawhnu dar 1:30 hian Bawngkawnin Zemabawk North hmaah fiahna an hmachhawn dawn a, hna a awlsam dawn lo. Tun ṭum inelnaah Zembawk an tel loh avangin, an player ṭhate Zemabawk North nen an infin a tih theih a, an tawh a khirh khawp ang.

Bawngkawn hian Armed Veng South 2-1 a an hneh hmain Mission Vengthlang 4-1 in an hneh a, an veng chhuanvawr MS Dawngliana'n training a zawm leh tawh bawk.

Chutihrualin Dawngtea inlan hma pawhin Joseph Lalvenhima, Lalpekhlua leh Silvana R. Lalruatkima te hmangin an goal bawh a na a, midfielder ball sem thiam Zonunmawia an neih bawk avangin an game a mawi tel bawk.

Mahse, Bawngkawn inkhelh hun hi Chanmari FC training nen a insut buai chuan Rindika hote hi an buai viau thei bawk. Zemabawk North erawhin Aizawl FC midfielder pahnih Peter Lalrinhlua leh Samuel Lalmuanpuia te an chhawr thei lo tih an hre sa, an tel loa game plan an neih avangin buaina tur an nei ve lo.

Zemabawk North hian Bethlehem leh Farkawn te 2-0 ve vein an hneh a, hnehna an chan kawngah winger Freddy Lalrinchhana a pawimawh. Chutihrualin team ṭha an hmachhawn dawn avangin tlarhnung lama awm H. Malsawmdawngkima leh Gilbert Lalbiaksanga te chet ṭhat a ṭul khawp ang.