Inter Village Football 2024: Chanmari West khingpui tur Ramhlun North

GIG Motors MFA All Mizoram Inter Village Football C'ship 2024-ah vawiin chawhma dar 11:00 hian Ramhlun North leh Chanmari West te an inkhel ang. Inkhel hi Zonet Rihnim leh YouTube channel-ah a en theih.

MPL club Chhinga Veng enkawl tawhtu H. Lalremruata kaihhruai Ramhlun North hian last 16 thleng turin team ṭha Chanmari an hneh thei a, dah hniam chi an ni lo.

Chanmari an hneh ṭumin Mizoram junior team-a player pawimawh ni pha Lalremtluanga (Mamatea) a hmuhnawm a, chutihrualin Ramhlun North hi player malah an innghat lo.

Ramhlun North hian Mizoram Police forward F. Lallawmkima bakah AIFF Elite Academy chhuak B. Rohmingthanga te an kawl a, tlarhma lam an nei ṭha hle.

Chanmari West hian Zonuam 2-1 a an hneh hnuah Melthum 5-1 in an sawp a, last 16 lut turin Electric Veng nen hun pangngaiah 3-3 a inhnehtawkin, penalty shooout-ah 5-3 in an vannei ta zawk.

Electric Veng nena an inkhelh ṭumin coach H. Lalnunzira hnawhchhuah a ni a, vawiinah team a ho thei lo ang. Chanmari West hi team ṭha tak ni lo mah se midfielder theihna nei sang Lalengmawia a awm a, Ramhlun North an hmachhawn hunah a mawhphurhna a sang khawp ang.