Inter Village Football quarterfinal-ah Kolasib Jt, Bethlehem VT, Melbuk leh Armed Veng

GIG Motors MFA All Mizoram Inter Village Football C'ship 2024-ah Kolasib Jt-in Republic Veng 5-0 in an sawp a, inkhel dang pathumah erawh penalty shootout hmangin chak tur zawn vek a ni. Bethlehem VT, Melbuk leh Armed Veng ten an khingpui Salem Veng, Durtlang leh College Veng te an hneh.

Quarterfinal hi December 4, Nilaini hian RG Stadium-ah khelh tur a ni a. Kolasib Jt-in BVT an hmachhawn ang a, Melbuk leh Armed Veng te an inkhel bawk ang. Final hi December 12, Ningani zana khelh tur a ni.

Goal a sur

Kolasib Jt leh Republic Veng inhnehtawk tura ngaih ni mah se team pahnih an intluk tawk lo. Republic Vengin Chanmari FC training vangin goalkeeper RS Lallawmzuala an chan a, a nghawng a lian. Lawma hmunruak hi right back Vanlalhmangaiha'n a luah khat zo lo a, Kolasib lam an ṭha hrim hrim bawk. Police winger Isaak Malsawmkima'n minute rukna lekah goalkeeper a pet khum nghal.

Paul Ramfangzauva hmangin Kolasib-in midfield an thunun a, William Lalnunfela hmanga a khung belh hnuah Paul-a'n a khung ve leh bawk. Second half-ah Republic Vengin nawr tumin khelh dan thlak hret mah se Kolasib an chungung a, chance ṭhahnem tak neiin Lalrosanga Hrahsel leh Laldammawia te hmanga khung belhin 5-0 in an chak.

Penalty Shootout 3

Bethlehem Vengthlang leh Salem Veng te an inkhel tawk a, BVT hi team nem zawka ngaih ni mah se coach Lalsangzuala Hmar enkawl a ni tlat. Sanga hoten hian Salem Veng an chelh a, penalty shootout-ah 3-2 in an hneh zui bawk.

Durtlangin champion ngei tumin squad an inthuam chak a, Melbuk lakah pawh an khung hma. Lalliansanga (Notea) hmangin minute rukna lekah an khung. Melbuk lamin captain Lalsawmzela'n box pawn aṭangin crossbar perin a pet goal. Goal a dang luh belh a, penalty shootout-ah coach Lalrozara enkawl 5-4 in an vannei ta zawk.

Armed Veng leh College Veng ten an tawp an khar a, goal ruk ngawt a lut. College Vengin Rohlupuia Pachuau, Lalrosanga Hrahsel leh R. Laldammawia te hmangin ṭum thum hma an hruai a, Armed Vengin Lalawmpuia Hnamte hattrick hmangin an sut leh vek. Goal hnuhnung ber hi injury time minute 11-naah a lut! Penalty Shootout-ah Armed Veng goalkeeper Andrew Lalhmingliana'n vawi hnih a save a, Armed Veng 5-4 in an vannei ta zawk.