Old Trafford-ah hlimna a kir

Manchester United chuan Arsenal an tlawh hmain Old Trafford-ah match zawnin an chak. Ruben Amorim-a hote hian Europa League-a Bodo/Glimt 3-2 a hneh hnuin Pathianni zan khan Everton 4-0 in an sawp.

December 4, Nilaini zan dar 1:45 hian Man United-in Emirates Stadium-ah Arsenal an hmachawn dawn a, Amorim-a kaihhruaina hnuaia hmasawnna a awm avangin inkhel en a châkawm sawt.

Portuguese manager Amorim-a'n a khelh dun dan angin defender lai pathum a hmang chhunzawm zel a, player a enchhin pah zel bawk. Toffees lakah bul ṭan ṭha tawk lo mah se Marcus Rashford-a'n minute 34-naa goal hmahruai a khung hnuah inkhelh kal hmang a dang daih.

Amad Diallo-a Foxes defender ball chhuhsakin Bruno Fernandes-a'n ball per hi a lalut a, United captain ball pek chu Joshua Zirkzee-a'n minute 41-naah a khung.

Second half ṭan chiahah Amad Diallo hmangin Man United-in an vaw let a, a ball pek ṭha chu Rashford-a'n minute 46-naah a khung nghal. Diallo hi Amorim hnuaiah a che ṭha a, an goal lina pawh a thawhrah a ni.

Diallo hian a chet ranna hmanga Foxes player a chhuhsak hnuah ṭha takin a lalut a, mahni hma sial lo takin Zirkzee a pe a, Dutch forward hian cool takin a khung. Man United 4-0 in an chak a, Amorim hnuaia Premier League-a an chakna hmasa ber a ni.

Man United chak chiang mah se manager Amorim chuan, "Duthusam kan la hlat hle. Insiam ṭhatna tur leh inzirna tur ṭhahnem tak kan la nei a ni," tiin a sawi a, hma an sawn zel dawn niin a lang.