Aizawl FC fiahna tur Gokulam

Zanin dar 7:00 hian Aizawl FC-in EMS Stadium-ah Gokulam Kerala an hmachhawn dawn. Tun season I League-ah hian Inter Kashi, Sreenidi Deccan leh Gokulam te hi champion rinkai an ni a, Mizo club tan Kerala club hi fiahna ṭha tak a ni ang.

Aizawl FC-in Kerala an pan hmain RG Stadium-ah Dempo nen goal awm loin an inhnehtawk a, zin chhuah hma chiahin SC Bengaluru 2-0 in an hneh. Victor Lalbiakmawia hote hian Mizo hlanga an khel chungin an tlarhnung a phui a, tun inelnaah goal an la chhuah lo.

MPL chhiar telin Mizo club hian match sarih chhung goal an chhuah tawh lo a, team ṭha Gokulam lakah Lalchhawnkima leh ṭhiante an pawimawh dawn. Kimima leh Lalhrezuala ten inkawp ṭha a, Lalrempuia leh Lalfelkima te mual sirah an ṭangkai a, defensive midfielder Lalthankhuma'n a hna thawk ṭha bawk.

Gokulam erawh an goal bawh a na tawh dawn. Kerala club hian Aizawl FC player hlui R. Ramdinthara pawh an kawl a, Tharpuia hian Sreenidi lakah chakna goal a khung tawh nghe nghe.

Chutihrualin Tharpuia hian bul a la ṭan lo a, Malian forward Adama Niane leh Uruguayan winger Martin Chaves te hmangin an nawr dawn a, mual laiah Spanish midfielder Sergio Llamas a awm. Mizo club tan a hautak dawn hle.