Dan rual loh Chelsea

Cole Palmer hoin Chelsea chuan hmalam an pan zel a, an khingpui an hneh cho miah miah mai - Pathianni zan khan Blues hian anh mikhual Aston Villa chu 3-0 in an sawp.

Stamford Bridge-a inkhelah Chelsea tan hian Nicolas Jackson, Enzo Fernandez leh Cole Palmer ten goal khat ṭheuh an khung a, English forward Palmer hian goal a khung bakah Fernandez-a goal khung tur hi a siamsak a ni.

Enzo Maresca kaihhruaina hnuaiah Blus an kang sang zual zel - Premier League match 13 an khelh aṭangin point 25 an hmu a, pathumna niin pahnihna Arsenal nen an point a inzat reng a, hmahruaitu Liverpool an um ngam.

Chelsea manager erawh a la ṭawng fimkhur hle thung, danglamna thlen mektu coach Maresca chuan, "Player ṭhenkhat hian an theihna sang tak an pho lang tawh a, ṭhenkhatin hma lam an pan mek bawk, kawng dik kan zawh mek.

"Tunah hian champion inum sawi hun a la ni lo, tun aṭanga rei vak lo hnuah erawh chuan champion tum inum zingah kan tel thuai ang," tiin a sawi a, a naute tan boruak riat siamsak a duh lo.

Aston Villa erawhin hun harsa an tawng mek - Unai Emery-a'n a enkawl chinah chak ni hmel hmu loa an kal rei lai ber a ni. October thla khan Champions League-ah Bologna an hneh a, a hnuah erawh match riat chhung chu chak ni hmel an hmu tawh lo a ni.