Kane tel loin Bayern inlan dawn

Season hmasaah Bayer Leverkusen-in German football an thunun a, Bundesliga nomawi an chawi bakah DFB-Pokal champion an ni tel a, a tuartu ber chu kum tam German football lo thunun tawhtu Bayern Munich an ni.

Vincent Kompany hoa indinthar tumin Bayern-in season an hmachhawn a, zawi zawiin an insiamrem mek - Bundesliga-ah hma an hruai a, champion an tum tih an pholang nawn. Match 12 an khelh tawhah an la tlawm lo a, point liin an sang fal mek.

Bayern tan Leverkusen petchhuah lehna tur pakhat chu German Cup a ni a, zanin dar 1:15 hian round of 16-ah Leverkusen hi an mikhual dawn - double leg khelh a nih dawn loh avangin chetsual a thiang dawn lo.

Kane tel lohna

Mahse, Bayern-in an ṭhat dan berin Leverkusen an mikhual thei dawn lo - an striker chhuanvawr Harry Kane chu Borussia Dortmund nen an inkhelh ṭumin a inhliam a, zaninah a la inlan theih loh tur thu Kompany chuan a sawi.

Bayern boss chuan, "Kuminah a inkhel leh hman mai thei tih chauh a ni a, sawithiam a harsa hle. Match khelh theih loh chu a nei nual dawn chiang sa - Kane-te ang thlak chu thil theih loh a ni a, mahse, kawng dangin kan buaina chu kan chingfel mai ang.

"Talent nei ṭha tak tak player kan nei nual a ni," a ti a, Belgian coach hian an khelh dan hmang a thlak dawn niin a lang - chuti a nih chuan tawnhriat nei ṭha Thomas Muller a luh a rinawm a, Serge Gnabry, Michael Olise leh Leroy Sane ten goal khung lamah mawhphurhna lak thiam a ṭul dawn bawk.

Hei le Leverkusen

Xabi Alonso enkawl Leverkusen tan season hmasa ang renga chet ṭhat theih a ni lo, tih chu thil chiangsa a ni. Tun season-ah pawh league match 12 khel tawhin, table-ah pathumna an ni mek a, point sarihin hmahruaitu Bayern an thlau tawh.

Leverkusen hian zaninah Bayern an hneh chuan player-te an inringtawk lehzual ang tih a chiang a, Alonso-a'n player a nih laia a club hlui hneh a châk dawn. Mahse, Leverkusen hian an ṭhat dan berin Bayern an hmachhawn thei dawn bik lo a, November international break-a inhliam Victor Boniface a la dam lo.

Mahse, kum 28 mi Patrik Schick hian tun season match 16 a khelh tawhah goal riat a khung avangin Bayern tan thlamuan ngawt chi a ni lo a, match 20-a goal kua leh assist vawi nga nei tawh Florian Wirtz pawh ven bik ṭul tur a ni ang.