Inter leh Fiorentina inkhel zo thei lo

Inkhelh laklawh laiin Fiorentina midfielder Edoardo Bove chu khelmualah a tlu a, enkawl zui a ngaih avangin Inter Milan nena Serei A match an khelh lai chu tihtawp lailawk a ni.

Pathianni zan inkhelah Bove-a hi minute 16-naah nikhaw hre loin a tlu, damdawi inah hruai nghal a ngai. Italian club chuan an player hi ICU-ah dah a nih thu an sawi a, darkar 24 hnuah a dinhmun an puan leh theih tur thu an sawi bawk.

Fiorentina president Rocco Commisso chuan, "Forza Edoardo i kiangah kan awm reng a ni a, mi chak leh tuarchhel tak i nihzia kan hria, he hun harsaah hian i chhungte pawh kan thlahthlam lo ang," a ti.

Inter president Giuseppe Marotta pawhin khelmuala vanduaina thleng chu pawi a tih thu a sawi a, football chhungkua an nih avangin an tuarpui hle tih a sawi bawk - Fiorentina player leh a ṭhiante pawhin dam leh thuai tura an duh thu an ziak hlawm bawk.

Serie A chuan inkhel hi tihtawp lailawk a nih thu bak an la sawi lo a, ni danga an kalpui ṭhin ang a nih chuan remchang leh hmasa berah an khelh hmabak minute la awm aṭangin an khelh chhunzawm leh ang.

Pathianni zan Serie A inkhel dangah Napoli erawh an chak. League hmahruaitu Naples club hian Scott Mc Tominay-a goal khat hmangin Torino chu 1-0 in an hneh a, a chung berah an awmchhunzawm.

Antonio Conte enkawl Napoli hian Serie A match 14 aṭangin point 32 an hmu a, pahnihna Atalanta aiin point liin an sang zawk, mahse Atalanta hian match khatin an khel tlem thung a ni.

Napoli manager Conte chuan, "Ka naute hian hmasawn an ngaihna lai ka sawite an ngaithla ṭha a, chumi ti hlawhtling tur chuan theihtawp an chhuah ṭhin bawk, ka vanneih phah hle.

"Mimal tinin hma an sawn zel a, chumi belhkhawm chuan team hmasawnna a thlen. Turin khawpuiah hian kum 30 chuang ka cheng tawh a, inkhelh a harsat tur thu ka sawi lawk, chutiang hmuna point thum kan hmu hi a lawmawm," a ti.