Champion lawm nan Verstappen a chak

Tun season Formula 1 champion a nih hnua intlansiak hmasa berah Max Verstappen a chak - Red Bull driver hian Qatar Grand Prix tlan zawh takah hnehna a chang.

Dutch tlangval Verstappen hian awlsam takin hnehna a chang mai bik lo. Pathianni zan intlansiakah hian a elpui Lando Norris chu yellow flag zar laia tlan kuan tur bituk aia a tlan chak avangin second 10 hrem a ni.

Champion a chian tawh hnua intlansiak ni mah se a boruak a sang chhunzawm tih a chiang a, season tharah Red Bull duhlai Max-a hian elpui hautak a nei dawn a, McLaren driver Norris nen hian na takin an inum dawn tih a chiang hle.

Verstappen chuan, "Infiamna huangah chuan na taka inumin kan inel tur a ni, mahse ṭhenkhat min beih dan en hi chuan mak tih chang ka nei," a ti. Max-a hian a laka George Russell chet dan chu mak a ti hle a ni.

Lusail International Circuit-ah qualifying an tlan laiin Russell hian Verstappen hi hnung lam aṭangin a su a, intlansiak tak an tlan leh hnuah pawh buaina a siamsak zui, a chet dan chuan a zahawmna a ti chhia niin a sawi bawk.

Khawvela car intlansiakna sang ber hi tun season atan tlan hmabak pakhat an la nei. December 8, Pathianni hian Yas Marina Circuit-ah Abu Dhabi Grand Prix an tlan leh ang.