Ennawm ropui Premier League a hnai Inkhel hmuhnawmin a hmuak che

A zunah Mizote kan uai a, kar khat lek an khelh loh pawhin kan khua a har hman viau ṭhin a nih kha tiraw. Buaina leh harsatna hrang hrang kara season hmasa an hman zawh hnuah beiseina kawl a eng mek. September 12, Inrinni tlai aṭangin Premier League 2019-20 season chu khelh ṭan a ni leh tawh dawn.

Liverpool leh Manchetser City te chu nomawi inchuh leh tura ngaih an ni a, player thar nena inthuam ṭha Chelsea pawhin chuh buai phak an tum ang. Manchester United leh Arsenal hi rinkai ni chiah lo mah se team dang an hlau bik dawn lo.

Jose Mourinho enkawl Totten-ham Hotspur thaibo a thiang lo ang, tawnhriat ngah Carlo Ancelotti-a'n Everton-a player a lakluh dan aṭangin a sang pali zinga tel phak a tum tih a chiang bawk–kai thar West Brom, Fulham leh Leeds United ten eng chen nge an thlen theih ang tih thlengin hriat a châkawm vek.

Premier League hi team intiat tamna hmun, nomawi chawi harsatna leh rinlawk a harsatna hmun tia sawi ṭhin a ni. Mahse Jurgen Klopp-a'n a duh ang taka team a din meuh chuan EPL chanchin an sawina thu dik ni ṭhin kha thu dik loah a chhuah!

Juventus, Bayern Munich leh Paris Saint-Germain ten anmahni ram league ṭheuh an thunun aia chiangin Reds hian season liam ta khan EPL an thunun chiang. Pep Guardiola enkawl Man City meuh pawhin tih theih an nei lo, nomawi an chawi lai chu ralkhat aṭangin an thlir phak ṭawk.

Klopp-a'n a player hman thiam ho a la kawl kim thei, hliam vanga buaina an nei a nih ngawt loh chuan team dang hneh turin theihna an nei tih a chiang tawh. Mahse, captain Jordan Henderson a awm loh chuan hotu an mamawh tih Arsenal nen Community Shield an khelh ṭumin a lang.

Season hmasa khan Liverpool elpui Man City hi an defender Aymeric Laporte hliam vangin an buai a, an captain Vincent Kompany hmunruak luah tur an lak loh chu an buai chhan a ni bawk. Nipui bazar inhawn rualin defender Nathan Ake an lalut nghal–Reds hnunga awm an tum tawh lo.

Team tinin season thar an nghakhlel a, nghakhlel ber thlang dawn ila Chelsea an nih a rinawm. Nipui bazara player lei hnem ṭhin Blues hi season hmasa khan hrem an ni a, an bazar thei lo. Kuminah erawh club dang an chet theih loh laiin an duh apiang an lei emaw tih mai tur a ni.

Timo Werner, Kai Havertz leh Hakim Ziyech an neih vangin London club an phur, chutihrualin an hman thiamsa leh rinrawl Willian a chhuak thung. Frank Lampard-a'n attacking game a chhawpchhuah a rinawm, season liam ta an team aṭanga chhut erawh chuan an mamawh chu tlarhnunga khel tur a nih hmel.

Tlarhnung pawp thawm phui turin Thiago Silva an lalut, Brazilian defender hi tun thla chawhnu lama kum 36 tling mai tawh tur ni mah se Champions League final-ah khan a la tar lo tih a lang. EPL match zawng zawng khel tura rintlak a ni tawh lo a nih pawhin a tawnhriat chu midang tan a ṭangkai ang.

Silva bakah Leicester City aṭangin Ben Chilwell an lalut a, defender Xavier Mbuyamba leh Malang Sarr (loan-in a chhuak lehnghal) te pawh Stamford Bridge-ah an lawmluh tawh avangin an mamawh ang chu an lei kima ngaih theih a ni–keeper manto Kepa Arrizabalaga chu buaina tur nge buaina chingfeltu a nih zawk dawn a la hriat loh.

Liverpool leh Manchester City ten team nghet tak an din tawh avangin a chung lama awm tura ngaih an ni a, season hmasa palina Chelsea phawhin an dinhmun ngai an luah nawn theih a rinawm. Manchester United, Arsenal, Tottenham, Leicester City leh Everton ten hmunruak pakhat an inchuh dawn niin a lang.

Paul Pogba awmna Man United a nih chuan an danglam ṭhin a, France international hi a awm loh erawh chuan a hmunruak a zau ṭhin. Pogba awm loh kara an buaina langsar chu Bruno Fernandes awm hnuah a ziaawm–Ajax midfielder Donny van de Beek an lei bawk avangin squad a chhah ta hle.

FA Cup leh Community Shiled an lak avangin Mikel Arteta enkawl Arsenal pawh an boruak a ṭha. Arsene Wenger hun tawp lam aṭanga an buaina ni ṭhin, an elpui club lian dang an hneh thei lo chu Spanish manger hian a titawp mek. Pierre-Emerick Aubameyang an neih avangin an thla a muang ang.

Mourinho-a'n harhtharna thlen tum mah se season hmasaa Spurs thlen chin chu parukna a ni. Portuguese manager hian player langsar tak lakluh a nei hran lo, a club enkawl apiang nomawi a chawipui ṭhin avangin title duha tuihal North London club hian eng inelna emaw berah champion an tum dawn.

Leicester City striker Jamie Vardy-a'n season hmasa khan Premier League goal 23 khungin Golden Boot a dawng, a hnuaiah hian amah aia goal khata khung tlem Danny Ings leh Arsenal forward Pierre-Emerick Aubameyang te 

an awm.

Foxes hmatawng Vardy hi kum 33 mi ni tawh mah se a la chuai lo, kuminah pawh a khung hnem pawl a nih leh a rinawm. Arsenal captain Auba pawhin a vawi hnih nan EPL Golden Boot dawn a tum ang, Southampton striker Danny Ings tan erawh nikum phak a har tawh ang.

Manchester City striker Sergio Aguero hi goal khung thei tak ni mah se Gabriel Jesus nen an inkhelh chhawk ṭhin a, mimal lawmman dawng tur chuan rin thiam a har. Liverpool hmatawng Mohamed Salah leh Sadio Mane te hi rinkai zinga mi an ni bawk.

Season tir lama goal khung harsat ṭhin Harry Kane hian league goal 20 vel bawr khung hi ngaiah a nei tawh emaw tih mai tur a ni. Mahse English striker hi hliam vangin a buai ngun, match khelh loh a neih ṭhin avang erawh chuan mimal cheṭha dang an awm chuan atan khum a harsa ṭhin.