Chelsea an bazar nasa: Season thar beiseina a sang
Nipui transfer bazar-a Chelsea chet dan chu football khawvel titi a tling a, mi hausa ina nula changkang mo hlim ang maiin sum ren an tum lo hle.
London club hian player langsar tia chhal theih ringawt pawh Hakim Ziyech, Timo Werner, Ben Chilwell, Thiago Silva, Kai Havertz leh Malang Sarr an lalut tawh a, ṭhatpui tham an ni.
Chelsea-in nipui an hman dan hi tam tak chuan kum 2003-a thil thleng nen khan an khaikhin hial a, Roman Abramovich-a'n Chelsea a lei tirha a bazar dan kha chu vawiin thlengin football titi a la tling.
Frank Lampard hun a inher chhuak a, Covid-19 vanga club tam tak an insum laiin English manager hian sum ren miah loin player a leikhawm - Chelsea-in ngaihven an hlawh phah.
Pressure-a na dawn
Chelsea-in pound maktaduai 200 chuang player lakluh nan an seng tawh a, thil lang chiang tak chu Lampard-a'n season hmasa aiin tun season-ah pressure-a nei na sawt dawn tih hi a ni.
Player a nih laia Chelsea legend ni thei khawpa hming chhertu coach hian season hman zawh takah a bazar miah lo chunga Blues chu Champions League khel tura a tlinpui avangin fak a
hlawh hle.
Mahse, Lampard hian transfer bazar-a sum a hman loh avangin pressure a nei tel lo tih hriat a ṭha a, English coach hian pawisa inrenna awm loa a duh ang taka player a lakluh theih avangin beiseina a sang sawt dawn.
Lampard tan tun season hi fiahna tak tak tiin sawi theih a ni a, nomawi chawi a nei a nih loh chuan manager ban lama mikhual lo tak Roman Abramovich hian Lampard banna lehkha ziah mai a hreh lo ang.
A harsa dawn
Player langsar tak tak lakluh a, sum ren miah loa team thar din tum hi coach tam tak chak ni mah se nomawi chawi nghal tura dinchhuah hi a harsa lai chu a ni a, a bik takin Covid-19 vanga football khawvel a buai avangin hun chep tak karah players thar rual tan insiamrem a harsa dawn.
Kum 2003 khan Chelsea hian sum tam tak sengin team thar din an tum a, ni khata players panga lakluh te an nei - Jürgen Macho (free), Marco Ambrosio (free), Glen Johnson (£6m), Geremi (£7m), Wayne Bridge (£7m), Damien Duff (£17m), Joe Cole (£6.6m), Juan Sebatian Veron (£15m), Adrian Mutu (£15.8m), Alexey Smertin (£3.45m), Hernan Crespo (£16.8m), Neil Sullivan (£500k) leh Claude Makelele (£16m) te an lalut!
Nipui bazar-a Chelsea sum sen hi pound maktaduai 110-a tling hial a, a hunlaia sum hlutna ngaihtuah phei chuan tam tham tak a ni. Mahse, Blues hian Claudio Ranieri kaihhruaina hnuaiah Premier League-ah pahnihna dinhmun luahin Champions League semifinal an lut bawk.
Nomawi chawi loin Chelsea-in season an vui liam a, a tuartu chu Ranieri a ni. Hetihrual hian player tam tak lakluh hi chhiatna ngawr ngawra sawi chi pawh a ni chuang lo - Ranieri ban hnu a season khatnaah Jose Mourinho chuan players thar pakua ngawt lalutin Premier League nomawi a chawi tho.
Engtin nge Chelsea?
Lampard-a player thar neih dan enin a player rem dan tur chu hriat châkawm a ni a, Derby County boss hlui hian 4-3-3 formation a hman chu thil rinawm ber a ni a, rin loh taka contract thar ziak tu Olivier Giroud telh ṭalh a duh a nih chuan 4-2-3-1 a hmang ang.
Blues hian 4-3-3 an hmang a nih chuan tlarhmaah Werner a mal tlat ang a, a sir aṭangin Ziyech leh Christian Pulisic-ten an thlawp ang. Midfield-ah Mason Mount, N'Golo Kante leh Havertz an awm ang a, Kante hna hi tlarhnung venpui a ni dawn.
Left back-ah Chilwell chu hmun chang chiang tura ngaih a ni a, a laiah Antonio Rudiger leh Silva inkawpin mual ding lam sirah captain Cesar Azpilicueta a awm thei ang.
Chelsea hian French club Rennes goalkeeper Edouard Mendy chu lakluh beiseiin an hel mek a, kum 28 mi goalkeeper hi an lalut thei a nih chuan khawvela keeper manto ber Kepa Arrizabalaga tan chhuahna tur zawn chu thil fin thlak tak a nih a rinawm.
4-2-3-1 zawk?
Euro 2020-a khelh duh Giroud hian khelhna hmun a chan tur thu intiamna awm lo chungin Blues-ah a contract a pawhsei a rinawm chiah lo a, regular taka bul a ṭan lo a nih pawhin Lampard-a'n bench aṭanga danglamna thlen tur talin a luhtir fo a rinawm.
Lampard-a formation hman ṭhin dan enin 4-2-3-1 hmanga Giroud-a 'regular' theih dan a awm a, French striker hian bul a ṭan ṭhin dawn a nih erawh chuan mual vei lam sirah Werner a tawlh chhoh a ngai dawn thung.
Giroud-a hnung chiahah Havert awmin Ziyech chu mual ding lam sirah a awm ang a, attacking game khelh nuam ti zawk Mount chu bench lamah kirin Kante leh Mateo Kovacic-ten defensive midfielder role an chang ang.
A tawi zawnga sawi chuan Chelsea buaina hi player ṭha ngah luat vanga bul ṭantu tur zawn fuh a ni a, season hmasaa academy player nena an inpawh chawp lai ngaihtuah chuan Blues buai dan hi buai dan 'ṭha mi' a ni.
Chelsea Player lei te:
Date Pos. Player From Fee
1 July 2020 MF Edwin Andersson IFK Göteborg £40,000
1 July 2020 FW Malik Mothersille Leyton Orient Free
1 July 2020 MF Hakim Ziyech Ajax £36,000,000
1 July 2020 MF Jimi Tauriainen HJK Undisclosed
1 July 2020 FW Timo Werner RB Leipzig £47,700,000
20 August 2020 DF Xavier Mbuyamba Barcelona Free
26 August 2020 DF Ben Chilwell Leicester City £45,180,000
27 August 2020 DF Malang Sarr Nice Free
28 August 2020 DF Thiago Silva Paris Saint-Germain Free
4 September 2020 MF Kai Havertz Bayer Leverkusen £72,000,000
6 September 2020 GK Teddy Sharman-Lowe Burton Albion Undisclosed
Chelsea Players Chhuak:
Date Pos. Player To Fee
1 July 2020 FW Álvaro Morata Atlético Madrid £50,400,000
1 July 2020 DF Richard Nartey Unattached
1 July 2020 DF Marcel Lavinier Unattached
1 July 2020 GK Jake Askew Unattached
1 July 2020 DF Jordan Aina Unattached
1 July 2020 DF James Clark Unattached
1 July 2020 MF Nathan Atlético Mineiro £2,700,000
18 July 2020 DF Josh Grant Bristol Rovers Free
3 August 2020 GK Nicolas Tié Vitória de Guimarães Undisclosed
12 August 2020 MF Jacob Maddox Vitória de Guimarães Undisclosed
14 August 2020 MF Willian Arsenal Free
1 September 2020 MF Mario Pašalic Atalanta £13,500,000
1 September 2020 MF Pedro Roma Free