Saul 'Canelo' Alvarez-a'n DAZN a khing

Weight division palia world champion ni thei Saul 'Canelo' Alvarez chuan inremna a lo neihpui tawh  streaming service DAZN leh a promoter Oscar de la Hoya-te chu inremna an lo neih tawh an zah loh avangin pawisa chawi turin a khing a, pound maktaduai 216 chawi turin a ti!

California-a US district court-a thubuai a thehluhah Canelo hian boxing chanchina sum tamna ber contract a lo ziah tawh chu DAZN leh De la Hoya-te hian an zahsak lo tiin a puh a ni. 

Kum 30 mi boxer-in thubuai a thehluh aṭanga a lan danin DAZN leh a promoter-te lakah hian lawm lohna 11 a nei a, heng zingah hian contract zah tawk lohna te, hmalakna tura hma an lak lohna te leh inbumna te a tel. 

Alvarez-a lehkhaah hian, "DAZN leh De la Hoya-te hian an intiam tawnna an tih hlawhchham bakah Alvarez leh boxing fans laka an thutiamte an ti hlawhchham a ni," tiin a inziak. 

Kum 2018 khan Alvarez hian DAZN nen hian fight 11 nei turin inremna an ziak a, an iremna zat hi pound maktaduai 282-a tling. Boxing mai ni lo, infiamna khawvela contract hlu ber pawlah ngaih a ni. 

Court document aṭanga a lan danin fight 11 an neih tura fight hmasa ber an neih zawh aṭangin DAZN hian Del la Hoya company Golden Boy Promotions hnenah fight 10 an la hmabaka fight an neih dawn apiangin dollar maktaduai 40 an pe ang a, heta ṭang hian dollar maktaduai 35 chu Alvarez hnenah pek tur a ni ang. 

Contract-a inziak anga fight 11 zinga fight pathum chu Alvarez hian a hmachhawn tawh a, fight vawi lina tur erawhin inremna a la awm lo. June thla khan Alvarez aiawhte chuan DAZN hnenah lehkha an thawn a, mahse streaming service lar chak tak hian Alvarez-a fight hmachhawn leh turah dollar maktaduai 40 chu Golden Boy Promotions hnena an pek theih loh thuin an lo chhang. 

Hei hi Alvarez chuan hrethiam loin contract an lo neih tawh sa zah lohnaah a ngai a, pound maktaduai 216 chawi tir tur hian court lamah a zualko ta a ni. DAZN hian Alvarez-a'n kum 2019-a Gennady Golovkin a hmachhawn lo chu a fight neih leh tura pawisa an pek duh loh chhan angin an sawi niin thubuai thehluhah chuan a inziak. 

Alvarez chuan, "Golden Boy nena inremna kan neih khan boxer ka hmachhawn tur chungchangah DAZN-in thu an neih tur thu khawiahmah kan ziak lo a ni," a ti a, hei vang hian Golden Boy Promotions pawh hi thu thup neiah ngaiin a khing tel ta a ni. 

Hetihlai hian Golden Boy Promotions chuan US media lamah chuan DAZN lakah hian Canelo-a hmachhawn tur chungchangah engmah intiam kamna an neih loh thu an sawi a, he streaming service hian fighter an chhawpchhuah te lo hnarin contract an ziah tawh sa chu an zah loh thu a sawi. 

DAZN lam hian Alvarez-a hmalakna chungchangah hian thu leh hla an la nei duh rih lo a, Mexican boxer hi vawi hnih a lo hmachhawn tawh Golovkin bakah WBA world super-middleweight champion Callum Smith leh WBO world super-middleweight title kawltu Billy Joe Saunders-te nen inhmachhawn tura sawizawm mek an ni. 

Canelo Álvarez hian inhnek a hmachhawn tawh vawi 56-ah vawi 53 hnehna a chang thei a, vawi 36-a khingpui knockout-in vawi khat a tlawm a, vawi hnih a inhnehtawkpui. 

September 2013 khan Floyd Mayweather nen inhmachhawnin a tlawm a, boxer-a hmachhawn tawha a ngam loh awmchhun a ni. Golovkin nen hian September 2017 khan a vawi khat nan an inhmachhawn a, inhnehtawkah puan a ni. 

Alvarez hian September 2018-ah Golovkin hi a vawi hnih nan a hmachhawn leh a, majority decision hmangin chak zawkah puan a ni thung - inhnek a hmachhawn hnuhnung ber chu November 2019 khan a ni a, Sergey Kovalev chu round 11-naah knockout-in a chak.