Moto Grand Prix Italy-ah Movistar Yamaha an vul

Pathianni a tlan zawh tak Italian Grand Prix-ah Movistar Yamaha rider Jorge Lorenzo chu tuma umphak lohin pakhatna a ni a, a teammate Valentino Rossi chu pathumna ni bawkin team dangte el phak lohin Italy-ah Movistar Yamaha an vul. Tunhnai intlansiak hnuhung pathumah Lorenzo hi pakhatna a ni vek.

Mugello tlankawnga intlansiakah hian a pian a hnu lama a vawi khat nan Ducati rider Andrea Iannone chuan pole position aṭangin intlansiak bul a ṭan. Hnehna chang turin Iannone bul ṭanna hi ṭha hle mah se Lorenzo a dang zo lo. Intlansiak an ṭan chauh tihin hmahruaitu Iannone an kawng kawi a hmang fuh lo nghal, a hnung ami Lorenzo chuan tlan pelin Lap 23 an tlan zawh thlengin tuman Yamaha rider hi an um pha tawh lo.

Rossi-a'n World Championship-a hmahruaitu ni chhunzawm turin a lo berah pangana tal a nih phak a ngai a. Pariatna aṭanga intlansiak bul a ṭan avangin a hna hi a awl sam lo. Lap khat an tlanna lekah pakua naah a tawlh hnun avangin a dinhmun a dinhmun a derthawng hman mah se a tawnhriat ngah chhawr ṭangkaiin zawite tein hma a sawn chho zel a, intlansiak a zawh meuh chuan pathumna a ni leh daih.

Italy-ah hian mipuiin bike intlansiak an hlut a, Pathianni pawh khan a hmunah mipui 90,000 chuang an pung khawm. World champion lai Marc Marquez a tlan ṭha hle a, qualifying lamah a tlan ṭhat loh avangin 13-na aṭangin bul a ṭan chauh.

Bike ṭhat leh corner lakthiam hmang ṭangkaiin Marquez-a'n a hmaa rider 10 a tlan pel a. Beiseina sang tak nen Lap ruk chauh tlan tur a awm tawh tihah pahnihna a tlan mek Iannone tlan pelh a tum luatah a chesual hlauh a, kawng sirah a tleng chhuak.

Vanduaina tawk Marquez hi a tlan tluan theih loh avangin point a hlawhchhuak lo a, champion lai ni mah se tun season intlansiak paruk awm tawh aṭangin hmahruaitu Rossi chu point 49 zetin a pha lo tawh. A lallukhum humhim a duh a nih chuan a chetsual a thiang tawh lo ang.

World championship a pahnihna ni mek Lorenzo chuan, "A zawna vawi thum hnehna chang tur chuan vanneih tel a ngai, tunah hian ka la duhtawk mai lo, vawi li pakhatna ka nih theih ka inbeisei. Ka tum ber chu hnehna chan a nih avangin ka theihna zawng zawngin intlansiak ka hmachhawn ṭhin," tiin a sawi.

Lorenzo hian hmaruaitu Rossi chu point ruk chauhin a phak lo. Italy-a podium a chan kha Lorenzo-a'n a intlansiak a hmachhawn tawh zawng zawng aṭangin podium vawi 88 a channa chiah a ni.

Kum 36-a upa Rossi chuan Marquez chungchang sawiin, "Tun dinhmuna Marc-a awmna hi mi zawng zawngin mak an hial ang. Rider ṭha tak ani a, a che fuh lo rih mai zawk niinka hria. Honda hian an engine leh team-ah hian fel lo deuh a awm pawh a ni mai thei. Mahse mi puitling an nih avangin ngai a awh chho leh thuai ang," tiin a sawi.

June 14 khian tun season-a vawi sarih nan Barcelona-ah intlansiak neih a ni leh ang.