Steven Gerrard vs Frank Lampard Tunge ropui zawk?

An vanglai chuan Liverpool captain Steven Gerrard leh Chelsea legend Frank Lampard te hi khawvel midfielder ṭha ber pawl an ni a, an khelh dan in an em avangin khaikhin an hlawh fo. Liverpool fan te chuan hniak khat pawh phawi lovin Gerrard ṭhat zawk thu an sawi anga, chutiang bawkin Chelsea fan-te ṭanna tur chu Lampard ṭhat zawk thu hi a ni ang.

Season tharah player ropui pahnih hian USA lama Major League Soccer-ah an hmel an lan dawn a, Gerrard hian David Beckham pawh lo lalut tawhtu Los Angeles Galaxy a pan dawn laiin Lampard hi David Villa te nen New York City FC tan a inlan thun ang.

Team tan an thawhhlawk dan

Liverpool fan te tana Gerrard dang­lamna em em chu, an khawtual naupang ngei, Liverpool Academy chhuak mahni chauh pawha Liverpool khaiding theitu a nihna hi a ni.

Lampard hlutna hi Chelsea fan tan a dang chuang lo, Chelsea-in hlawhtlinna a lo chan tawh tam tak zinga midfield khaikhawmtu chu Lampard hi a ni a, a zarah Chelsea hian nomawi an chawi hnem phah ti ila kan sawi uar lovang.

May 30-a kum 35 tling ve ta Gerrard hi Liverpool-in thlak danglam leh player lut chhuak an awm zut lai pawha danglam lo, a club tana dinnghet reng a ni.

Liverpool tan chuan Gerrard aia player ropui an awm kher lo ang. Hun harsa leh game khirhkhan an hmachhawn apianga Liverpool fan te'n a hming an lam ṭhin chu Gerrard a ni a, danglamna thlen turin an beisei ṭhin.

Chutiang bawkin Chelsea tana Lampard hnathawhte hi theihnghilh chi a ni lo. Hei erawh kan hriat tel a ṭul; Lampard hian a hunlaia khawvel player ṭha ber ber pawl a khelhpui a, a tan hlawhtlinna chan hi Gerrard ai chuan a awlsam zawk. Goal veng turin Peter Cech a nei a, defence lamah John Terry leh Ashley Cole te ho a nei a, ball ṭha pek tur Didier Drogba a nei bawk. Gerrard erawh Liverpool innghahna awmchhun a ni.

John Terry captain na hnuaiah Lampard hi free leh engthawl taka a khelh theih laiin Gerrard erawh captain nichungin a khel a, mawhphurna tam tak leh fan-te beiseina zawng zawng phur chungin a khelh a ngai ṭhin.

Gerrard hian player ropui a khelhpui lo bik tawp a ni bik lo. Fernando Torres leh Luis Suarez te a khelhpui tawh a, Liverpool midfield-ah Javier Mascherano leh Xabi Alonso te nen an lo inkawp ho tawh bawk.

Innghahna tlak player pahnih

Steven Gerrard chanchin an sawi apianga an sawi hmaih ngai tawh loh tur chu 2005 Champions League final kha a ni. AC Milan lakah goal thum an phurh hnuin Gerrard-a'n goal khat a khung a, a team-te fuihphurin theihtawpa an sual let hnuah 3-3 a inkhel pangngai ṭin in penalty-ah Liverpool an chak a, Champions League nomawi an chawi.

Kum 2006-ah Liverpool-in FA cup final-ah West Ham hnehin nomawi an chawi a, Reds champion an kawnga Gerrard thawh hlawk em vangin "The Gerrard cup final" tia hriat zui a ni ta hial.

Kum 2012 Champions League final-a Chelsea an champion ṭum khan hliam vangin captain John Terry a buai a, Blues tana lo dingchhuak chu tudang ni loin Lampard a ni. Kum 2013-ah Chelsea-in Europa League an chawi a, hemi ṭum pawh hian inhliam Terry tel loin Lampard-a'n Chelsea a khaiding.

Tunge ṭha zawk?

Manchester United Player hlui Phil Neville chuan, "Goal scoring midfielder ang zawnga chhut chuan Premier League chanchinah Frank Lampard aia ṭha an awm lo. Mahse, club pakhat tana an hnathawh ropui dan ngaihtuah chuan Gerrard hi Premier League chanchina player ropui ber a ni thung," a ti.

Everton-a a hun hnuhnung hmangtu Neville chuan, "Tunge ṭha zawk tih hi khai­khin thiam chu harsa tak a ni. A hna­thawh tawhte thlirin Lampard hi a ropui a, Liverpool tana a thawhhlawknate enin Gerrard hi player ropui tak a ni bawk," a ti.

Neville chuan, "Ni e, Gerrard hi Frank aiin a ṭha zawk a ni. Roy Keane a bula khel turin emaw Paul Scholes leh Michael Carrick kianga khel turin han hisap ve chhin mah teh u. He thil hi thleng se chuan United hian tun aia tam hi European Cup kan chawi ang tih hi in rilruah a awm nghal ka ring a ni," a ti.

United tana match 386 khel tawhtu chuan, "Liverpool hian player ropui tak tak an lo nei tawh ṭhin a, mahse Liverpool player pakhat pawh hi United tana khel turin ka la awt chhin ngai lo. Gerrard erawh a danglam bik a ni. United midfield-ah Scholes emaw Keane te nen han inkawp se chuan duhthusam thleng dik a ni mai," tiin Gerrard a dah sang hle.

Welsh footballer lar ṭhin leh foot­ball pundit ni ta Robbie Savage chuan, "Midfielder ka hmachhawn tawh zing­­ah Steven aia ṭha an awm lo a, Lam­pard hi a ni tluk teuh ber chu a ni.

Lam­pard hian title a la hnem zawk ngei tih chu kan hre vek. Mahse, hei hi chu amah vang ngawr ngawr nilovin player ṭha zawk leh team ṭha zawk a khelhpui vang a ni. Gerrard-a'n Liverpool tana hna a thawh ang zawng zawng hi Lampard hian a thawk ve thei ang em? Kei chuan a theih ka ring lo a ni. Frank hi goalscoring midfielder ropui tak a ni a, mahse Gerrard anga 'complete' player erawh a ni lo. Chu chu an pahnih inkara danglamna chu a ni," a ti.