Nomawi beisei Serena leh Azarenka an chak

Serena Williams chuan Grand Slam nomawi 24-na chawi tumin kawng dik a zawh zel, Nilaini zan khan quarterfinal khelin a khingpui Tsvetana Pironkova chu 4-6, 6-3, 6-2 in a hneh.

American star hian set hmasa lamah tihsual a ngah a, set hmasa ber game nganaah a service a hloh avangin a hniam zawkah a awm. Set hnuhnung pahnihah erawh Serena a chesual nan tawh lo, break point vawi kua a hmuh zinga pali chhawr ṭangkaiin a tlang.

Kum 36 mi Serena hian semifinal-ah chuan world number 1 hlui Victoria Azarenka a hmachhawn leh ang. Azarenka hian inkhel dangah seeded 16-na Elise Mertens chu 6-1, 6-0 in a lo sawp ve thung a ni.

US Open vawi ruk champion tawh Serena chuan, "Ka ke a na deuh a, taksa pang ṭhenkhat pawh a nuam lo. Mahse natna leh harsatna tam tak ka lo paltlang tawh ṭhin avangin tun ṭumah pawh ka buai phah lo," a ti. Fa nei tawh chin chuan engkim an tih theih a rin thu a sawi bawk.

Serena hmachhawn leh tur hi tun thla tir lawka Western & Southern champion kha a ni a, tun hnaiah a khelh ṭhat tluan em avangin tualchhung player Serena tan pawh hmachhawn a harsa hle tura ngaih a ni.

Australian Open vawi hnih champion tawh Azarenka chuan, "Serena hi ka player zah tak a ni a, Grand Slam semifinal-a kan intawng thei tur hi ka lawm. Ka ṭhian ṭha leh elpui hautak a ni bawk," tiin a sawi.