RG Stadium-ah Aizawl FC an chak ta

Aizawl FC chuan tun season I League-a a vawi khat nan an mual RG Stadium, Mualpuiah hnehna an chang a, Thawhlehni zan khan Imphal-a an hneh tawh loh Tiddim Road Athletic Union (Trau) chu 2-0 in an hneh. Mizo club tan substitute Abdoulaye Kanoute-a'n goal hnih a khung a, table-ah pasarihnaah an inhlang chho bawk.

Mizo club hian match kua khelh tur an la nei a, RG Stadium-a an inkhelh leh hmain khualmualah match nga an khel phawt ang. Aizawl FC coach Standly Rosario chuan inkhelh banah mipui thlawpnaah a lawm thu a sawi.

NorthEast Derby a hmuhnawm a, Aizawl FC-in ṭan phat aṭangin bul an ṭan ṭha. Trau player zingah keeper Mithun Samanta a langsar a, ani zarah hian first half-ah mikhual team-in goal an chhuah lo.

Kolasib tlangval pahnih William Lalnunfela leh Paul Ramfangzauva ten football mawina an lantir a, Paul-a ball vawrh chu William-a'n defender a sep khum hnuah volley nghalin Mithun-a'n a dang. East Bengal laka goal awmchhun khungtu Matias Veron-a ball pet chu Mithun bawkin a dang a, Justice Morgan-a freekick dangtu pawh Trau keeper tho a ni.

Aizawl FC-in an mualah chak phuṭhin mah se an vanduai leh ṭhin. Standly Rosario hoten nat nawn an duh tawh lo a, danglamna thlen turin second half-ah Abdoulaye Kanoute luhtir a ni.

Minute 76-naah Lalthlahlova (Patea) cross chu Kanoute hian ṭha zetin a tauh goal a, chak rim a nam nghal avangin Aizawl FC ṭantute an phur hle. Malian forward Kanoute hian Rochharzela cross ṭha zet chu crossbar tauh per nan hmang mah se injury time-ah chak nemnghehna goal a khung ta tho. Injury time-ah Alfred Kemah Jaryan-a'n freekick aṭangin kawh zetin crossbar a pet per a, hemi per hi Kanoute-a'n a khung.

Aizawl FC ṭantu Red Army te tun season-a thawm an neih rin ber ṭum a ni a, Kanoute-a'n an nat nawn phal loin goal hnih khung sakin point thum hlu tak a hlawhchhuahpui. Mizo club-in inkhel an thunun a, Trau technical director Nandakumar Singh chuan, "Team ṭha zawk an chak," tiin inkhelh banah a sawi.

Aizawl FC-in Mizoram Premier League nomawi an chawi theih nan Richard Kassaga a pawimawh a, MPL8 best defender hi East Bengal nen an inkhelh ṭuma a inhliam avangin Trau a hmachhawn thei lo.

Mizo club hian tun season ṭantirha Mohun Bagan laka an goal an venhim hnuah Richard leh Joseph Adjei te inkawp hmangin East Bengal lakah goal an chhuah lo. Inkhelh hma hauhin Aizawl FC tlarhnung a nghing a, coach Standly Rosario erawhin, "Rosanga ka ringtawk. MPL-ah a ṭhatzia kan hmu vek," tiin Mizo tlangval chungah rinna a nghat.

Aizawl FC tlarhnung hian first half-ah Trau goal nawr tur an dang chat a, second half-ah erawh mikhual hian ṭum hnih chance an nei thung. Trau forward Joel Sunday goal khung tur chu Joseph Adjei-a'n a dang a, Ghanaian defender Adjei hian Trau forward Joseph Mayowa goal khung tur a dang leh bawk. Aizawl FC-in tlarhnung an rem phui ṭha a, MPL an champion ṭuma an inrintawk ang chiahin I League-ah pawh an inkhel a hmuhnawm hle.

Mizo club-in Real Kashmir an hneh loh ṭumin 'Standly Out' tih thawm hriat tur a awm. Tun ṭumah erawh East Bengal hneh zo hlim an nih avangin inkhelh hma hauhin mipui an phur nghal. 

Aizawl FC coach Standly Rosario chuan, "Result a ṭhat loh chuan fan-te chuan min sawisel a thiang. East Bengal leh Mohun Bagan ka enkawl lai pawhin Kokata Derby boruak a sang ṭhin hle. Mipui lungawi lohna ka hrethiam a, uar zawka ka sawi duh erawh lawmthu sawina a ni. Mizo mipuite hi player 12-na an ni a, kan chakna kawngah pawh an ṭangkai hle," tiin lawm thu a sawi.