Armed Veng khingpui tur Melbuk

GIG Motors Inter Village Football quarterfinal-ah vawiin chawhnu dar 1:30 hian Armed Veng leh Melbuk te an inkhel dawn. Lalramchullova enkawl Armed Veng hian veng/khua inelnaah sulhnu nei ṭha zawk mah se tun ṭumah erawh F. Lalrozara enkawl Melbuk hi chak tura rinkai an ni zawk.

Armed Vengin quarterfinal lut turin an veng field-ah Ramthar Veng (1-0), Leitan Ramthar (6-2), Chaltlang Lily Veng (1-0) leh College Veng (3-3 Pen 5-4) te an hneh tawh a, Melbuk erawh RG Stadium-ah an hmachhawn dawn.

Chullova enkawl Armed Veng squad a chhah tawk lo a, match hmasa berah midfielder Eric Lalsangzuala inhliam nghal a, Lalmuanzova leh Vanlalduatsanga te an inkhelh zui a rem tawh lo bawk. Tawnhriat nei ṭha Lalfakzuala chu inlhiam vangin College Veng an hneh ṭumin inhliam vangin lakchhuah a ni a, Mizoram Police hi an chhawr lui thei a nih pawhin a ṭhat hteih dan berin a khel thei dawn lo.

Mahse, Armed Veng hian Second Division club an nei a, an football club player-te hmangin quarterfinal an thleng chho. Chutihrualin Lalawmpuia Hnamte-in a theihna sang ber a lantir a, goal li lai a khung tawh. Veng/Khua inelnaa vawi ṭham hnem ta nomawi chawi tawhtu Armed Veng hian Melbuk laka tlawm an hreh ang.

Melbuk hian Zanlawn (4-0), Saikhamakawn (5-1) leh Phunchawng (12-0) te an sawp hnuin team ṭha Durtlang nen hun pangngaiah 1-1 in an inhnehtawk a, penalty shootout-ah 5-4 in an vannei ta zawk.

Darzo pa Rozara enkawl Melbukin hma an sawn zel a, tun ṭuma an khelhna tur RG Stadium hi an training-na ṭhin a nih avangin an khelh tawhna Chite Ground leh 1st Bn MAP Ground aiin an hman thiam zawk a rinawm bawk.

Melbuk tan captain Lalsawmzela'n mamawh hunah a la inlar thei a, goal li ngawt a khung tawh. Chutihrualin tlarhmaa awm Lallawmsanga (LS-a) hian goal riat ngawt a khung tawh avangin MPL9-a Chawnpui FC champion puitu hi ven uluk a ṭul ang. Player thlirin Melbuk hi team ṭha zawk an ni a, mah se Armed Veng erawhin boruak sang an ngam tih hriat a ṭha.