Mizoram tel lohna Santosh Trophy final round fixtures a chhuak

78th Senior National Football Championship for Santosh Trophy final round chu December 14. Inrinni aṭangin Hyderabad, Telangana-ah khelh a ni dawn. Final round hi team 12-in an khel dawn a, group stage paltlangtu team pakua bakah champion lai Services, finalist Goa leh inelna thlengtu Telangana te an ni.

Nikum semifinalist Mizoram erawhin qualifying round an paltlang zawh loh vangin final round-ah an inlan thei dawn lo. Mizoram hi Manipur, Tripura leh Sikkim te nen group khatah an awm ho a, match hnuhnung berah Sikkim sawp mah se Tripura leh Manipur an hneh loh avangin Hyderabad an zin ve thei ta lo.

Mizoram awmna group aṭangin Manipur an tling a, NorthEast aṭangin Meghalaya an tling bawk. Group A-ah champion lai Services bakah West Bengal, Manipur, Telangana, Jammu & Kashmir te an awm a, group B-ah Goa, Delhi, Kerala, Tamil Nadu, Odisha leh Meghalaya te an awm thung.

Group stage hi December 24, Thawhlehniah khelh zawh a ni ang a, group khat aṭangin a sang pali ve vein quarterfinal an lut dawn. Final hi December 31, Thawhlehniah khelh ni ang.