Arsenal mualah Man United hmel thar

Zanin zanin lai dar 1:45 hian Arsenal chuan Manchester United an lo mikhual dawn - Mizoram aṭang chuan Ningani zing lam a ni tawh dawn a, zan khaw taireka inkhel tur ni mah se Premier League ngaina tan chuan hmaih phal chi a ni lo ang.

Mikel Arteta enkawl Arsenal hi hmanni deuh khan an talbuai a, tunah erawh an insiamṭha leh tawh - inrintawkna sang tak nen mikhual an thleng thei dawn. Man United pawh manager thar Ruben Amorim hnuaiah an insiam thar mek, an phur ang tih a sawi ngam.

An danglam

Season tir lama Manchester United leh tun dinhmuna Manchester United chu an danglam tawh, an khingpui tur Arsenal forward Kai Havertz pawhin a hmuh hmaih lo, fimkhur taka an khelh a ngaih tur thu a sawi.

Germany international forward Havertz chuan, "Erik ten Hag awm loh hnuah thil kalhmang an tidanglam, an khelh dan phung leh player inlah an danglam a, chuvangin tun hma lama kan intawn tawhna nen chuan a danglam dawn hle.

"A pawimawh zawk chu keimahni lam a ni, nghet leh ṭha taka kan khelh theih a pawimawh. Team ṭha dang kan hneh thei lo a nih chuan dinhmun sangah a awm theih loh, kan khelh fuh erawh chuan dan theih kan ni lo ang," a ti.

Gunners hian tun hnai season hnih chu EPL nomawi an chawi teuh thei hle, tunah Liverpool an um leh mek. Havertz chuan, "Dinhmun duhawm taka din chu tu pawhin an duh vek, chutihrualin kan tawpna tur a la ni lo," tiin beisei an neih thu a sawi bawk.

Fiahna hmasa

Manchester United hian season tir lam khan goal khung an harsat, an league match hmasa 12 aṭangin goal 13 chauh an khung, an match hnuhnung berah erawh Everton lakah 4-0 in hnehna an chang, an boruak fuh vanglai tak a ni.

Man United manager Ruben Amorim chuan, "Match tin mai hi kan tan chuan fiahna a ni a, chutihrualin Man United ka enkawl chinah chuan kan team hmachhawn tur zinga ṭha ber an ni a, kan match hnuhnung ber pawh kha a lan ang ngawta awlsam a ni lo.

"Inkhel kalhmang kan man thiam a, keimahni mai bakah kan ṭhiante theihna kan hriat tel a pawimawh, a hmasa berah chuan ball chang tam chunga inkhel kan thunun a ngai," a ti. Arsenal khelmuala inkhel thunun tur chuan a naute an tlan tam a ngai khawp ang.

Portuguese manager Amorim awm chinah Marcus Rashford chu hmuh theih khawpa danglam a ni a, ani hian Arsenal a ngam ṭhin viau - English forward leh Bruno Fernandes te inkhawp hi William Saliba leh Gabriel te tan hna awlsam a ni dawn lo, inrin reng a ngai ang.