Salah contract sawi a hun lo - Slot

Liverpool coach Arne Slot chuan Mohamed Salah-a contract chungchangah thuchiang engmah a la awm loh thu a sawi a, Dutch coach chuan, "Ka chhanna hi in ning ve tawh tho mai thei a, mahse, a ngai reng a ni e. He lai hi Salah contract chungchang sawina tur hmun a ni lo," a ti!

Salah hian season tawp rualin a contract a hmang zo tawh dawn a, tun hnaiah contract thar zawrh a nih loh thu inkhelh zawh apiangin a sawi a ni ber - Manchester City laka 2-0 a an chak ṭum pawhin Salah hian, "Anfield-a City ka hmachhawn hnuhnung ber tur angin ka khel a ni," tiin a sawi.

Mahse, Slot chuan hei hi fiamthu nan hmang zuiin, "Salah hian City-in thubuai 115 an neih avanga season thara Premier League khel lo thei dinhmuna an din thu a sawina a nih ka ring a, mahse, kei chuan City hi Premier League khel zel se ka duh," a ti - a sawi zawhah fiamthu a nih thu a sawi lang bawk.

Slot chuan Manchester United legend Gary Neville-a'n nomawi chawi tura dinhmun ṭha ber an nih thu a sawi chungchang pawh chhangin, "Season ṭantirah khan kan chungah kawng dang daihin rinna a nei a, a ngaihdan kha kan fans tih loh mi tam zawk chuan an pawm dan pawh a ni.

"Mahse, keini chuan nomawi chawi thei tura dinhmun ṭha bera awm angin kan inngai lo. Hmabak hautak em emin min hmuak leh a ni - Real Madrid leh City kha a hautak a, khualmuala Newcastle United hmachhawn a hautak lehzual ang," a ti - point kua ngawta league table-a sang fal tawh Reds hian zanin dar 1:00-ah Newcastle United chu league match khel turin an lenchilh ang.

Slot chuan, "Dinhmun duhawm takah kan ding ngei a, mahse, season chanve pawh kan la khel lo. Table chung lama Liverpool kan awm chuan, kan hmachhawn tur team tan hmachhawn châkawm a ni zel a, stadium a khat a, team zawng zawngin, Arsenal leh City hmachhawn ang châk ang thoin min hmachhawn an châk a ni," a ti.

Feyenoord boss hlui chuan fixture hautak chungchang sawi zuiin, "Thil ṭha tak chu, inkhel tam mah ila, keimahni chauh inkhel tam kan ni bik lo hi a ni. Entirnan, karlehah Everton kan tum dawn a, mahse, anni pawhin tun karah match an nei ve tho alawm - Champions League khelh vanga a lo tawt deuh a nih chuan a zia alawm.

"Kan match khelh leh tur pakua zinga paruk hi khualmualah kan khel dawn tih ka hre ve chiah a, a harsa ang. Mahse, kan inpeih e," a ti a, season hman ṭhat chhunzawm zel a tum.