Mizo tleirawl ten semifinal an lut

14th Hockey India Sub Junior Women National Championship khelh laiah nimin zing khan Mizoram chuan Uttar Pradesh lakah 1-0 in hnehna an chang a, an phu ang ngeiin semifinal an lut.

Secunderabad, Telangana-a inelna neihah Mizoram tan hian captain Laltlanchhungi chuan penalty stroke aṭangin goal awmchhun a khung a, anmahni goal lam an venhim zui theih avangin chak nan a tawk.

Mizoram team coach Lalroṭhuami (Bitei) chuan, "Kan naute an khel ṭha a, ni dang ang bawkin inkhel pawh kan thunun thei. Mahse, goal khung kan harsat ta deuh a, kan mamawh tawk erawh Pathian zarah kan khung.

"Semifinal-ah kan khelh leh tur chu Madhya Pradesh anni dawn a, anni hian mimala langsar tak nei lem lo mah se an ṭha rual hle. A tir aṭangin inthlahdah miah loa kan khelh tluan theih a pawimawh ang," a ti. Quarterfinal inkhel dangah Madhya Pradesh hian Haryana an lo hneh ve thung a ni.