AIFF-in Shrachi Sports leh Sony Sports inremna an ziak

India rama football thuneitu sang ber AIFF chuan Shrachi Sports nen inremna an ziak a, mipa leh hmeichhe club inelna leh national championship inkhel te chu SSEN app-ah an tichhuak dawn. Hei bakah hian I League match 132 aṭangin match 110 chu Sony Sports Network-ah pek chhuah ni bawk ang.

SSEN hian I League leh IWL tiamin 2024-25 season-ah match 338 a pe chhuak dawn a, inelna a pek chhuah tur dangte hi I League 2, Santosh Trophy leh Women's National Championship te an ni.

India rama club inelna sang ber dawttu I League pawh khelh chhoh zel a ni a, nizan khan Aizawl FC-in Gokulam Kerala an hmachhawn. Vawiin chawhnu dar 2:00 hian Real Kashmir leh Delhi an inkhel ang a, tlai dar 3:30-ah SC Bengaluru leh Churchill Brothers te an inkhel bawk ang.