Nomawi beisei thei kan ni lo - Maresca

Chelsea boss Enzo Maresca chuan beisei phak baka ṭhain season hmang mah se, nomawi chawi thei zingah an tel loh thu a sawi - Chelsea hian league match 13 khelh tawhah point 25 hmuin, table-ah pathumna an ni mek a, pahnihna Arsenal nen an point hmuh zat a inang.

Mahse, Maresca chuan, "Kum hnih liam ta chhung khan Arsenal hian City an hnaih hle a, keini erawhin hlat tak kan ni. Nomawi chawi thei zinga chhiar tel nih chu, kei leh player te tan min nawr kaltu ṭha tak a ni.

"Hetiang ang pressure neih hi nuam kan ti a, mahse, nomawi chawi thei zinga chhiar tel chi erawh kan ni rih lo. A chhan chu tun hnai kum hnih liam ta chhung khan Arsenal hi chu Liverpool leh City kiangah an awm a, keini erawh a ni ve lo - kan awm ve thuai erawh ka beisei," a ti.

Maresca chuan sawi zawmin, "Kan khelh dan leh result thlirin, ka beisei aia sangah kan awm. Ka player-te leh he club nen hian hun kan la hmang ho tam tawk lo em em a, a lawmawm lai erawh hei aia ṭhaa ti tur hian theihna kan nei a, kawng dik kan zawh zel hi a ni," a ti.

Chelsea hian zanin dar 1:00-ah league match khel turin table mawngphah luahtu Southampton an lenchilh dawn a, hnehna chan an inbeisei ang.