FA Cup-ah Champion lai leh champion ngun ber

Khawvela football inelna upa ber FA Cup third round khel tur fixture pawh a ni a, champion lai Manchester United leh champion ngun ber Arsenal te Emirates Stadium-ah an inhmachhawn nghal dawn. Third round aṭangin Premier League leh Championship club te an tel ṭan a, team 64 an la dam.

Man United hian season liam ta khan Erik ten Hag-a hoin an hmelma Manchester City chu final-ah 2-1 in an hneh a, a vawi 13 nan nomawi an chawi. Chutihrualin Gunners hian vawi 14 nomawi an chawi tawh a, champion ngun ber record chelhtu an ni.

Premier League hmahruaitu Liverpool erawh an hna a awlsam dawn a, Anfield-ah League Two Accrington Stanley an mikhual ang. Manchester City-in Salford City an hmachhawn dawn. Salford hi League Two club an ni a, a netiu zingah hian Man United player hlui Nicky Butt, Ryan Giggs, Gary Neville, Phil Neville leh Paul Scholes te an tel a ni.

Chelsea pawhin League Two club Morecambe an chang fuh a, Everton leh Peterborough inkhel tur hi Ashley Young vangin sawi a hlawh bawk. Toffees full back Young hian a fapa kum 18 mi Tyler hmachhawn theihna remchang nei ang.