Chhinga Veng an champion

Crciket Association of Mizoram (CAM) hnuaia inelna President’s Cup khelh zawh takah Chhinga Veng an champion.

Thawhlehni khan Suala Cricket Stadium, Sihhmuiah a hmawr bawkna hi neih niin, super over khelh a nih hnuah Chhinga Veng hian an khingpui Chanmarians chu run khatin an hneh.

Ṭhum vawra chak zawk Chanmarians lamin vuak hmasak an thlang a, an player ṭha Lalhruaizela che sualin run ruk chauh siamin a out. Wicket keeper Karan Chhetry (21 runs) leh captain Lalnunkima Varte (12) zarah run 61 an tlin hram.

Chhinga Veng lam tan inelna hmang ṭha tak B. Lalnunfela chuan wicket li la a, captain Lalchhandama Sailo-in wicket hnih lain run thum chiah a pe. Chhinga Veng pawhin run siam an harsat ve tho a, Ramhlunmawia (16runs) leh William Rinawma Pachau (13) zarah run 61 tho an siam.

Run siam zat a intluk avangtin super over hmanga chak zawk zawn a ngai a, Chhinga Veng lamin vaw hmasa-in run 12 an siam a, Chanmarians-in run 11 chiah an tlin theih avangin Chhinga Veng hian run khatin hnehna an chang ta a ni.