Daniil Medvedev hmaah Dominic Thiem

US Open 2020 champion tura rinkai Daniil Medvedev leh Dominic Thiem ten an khingpui ve ve hnehin semifinal an lut, player ṭha pahnih hi Inrinni zingah final luh inchuhin an inhmachhawh zui leh nghal ang.

Semifinal lehlamah Alexander Zverev leh Pablo Carreno Busta te an intawng ve thung ang. Champion lai Rafael Nadal leh Roger Federer te an inlan loh bakah, world number 1 Novak Djokovic a tlak tawh avangin champion thar an awm dawn.

Seeded pangana Alexander Zverev-a'n Nilaini zing khan Borna Coric hnehin semifinal a lo lut ve tawh bawk. Player ropui pathum awm loh karah a chhuak thar ten hun ṭha an nei mek a, tu nge hlawhtling dawn tih chu Pathianniah chinfel a ni ang.

Nimin zing Arthur Ashe Stadium-a quarterfinal inkhelah Medvedev a talbuai deuh dawn niin lang hman mah se a dingnghet tlat a, darkar hnih leh minute 27 chhungin Andrey Rublev chu 7-6 (6), 6-3, 7-6 (5) in a hneh.

Season hmasa finalist hi set hmasa bera tie break an khelh laiin a khingpuiin set point vawi li a hmuh a pawttla thei a, set thumnaah a dar na enkawl zuai ngai mah se harsatna lian tham a tawk lo - set hloh miah loin semifinal a lut.

Seeded pathumna Medvedev chuan, "Set pahniha kan inthlauhna chu point khat ve ve chauh a ni, a chang hi chuan chak turin vanneihna neih tel a ngai. Inkhel harsa taka hnehna chang hram ka nih avangin kumina hnehna ka chan zingah chuan ka lawm ber a ni hial ang," a ti.

Champion tura rinkai Dominic Thiem-a'n darkar hnih leh minute li chhungin Alex de Minaur chu 6-2, 6-1, 6-4 in a hneh. Minaur hi khel thei viau mah se Grand Slam quarterfinal a khelh vawi khatna chauh a nih avangin hun pawimawh laiah point hmuh a harsat.

Grand Slam final vawi thum khel tawh, mahse nomawi la chawi si lo Thiem chuan, "Novak, Roger leh Rafa an awm lo a ni mai thei, mahse Daniil, Zverev leh Pablo te an la awm. Player ṭha tak tak vek an nih hlawm avangin hmabak hi a la hautak hle.

"Semifinal-ah pawh kan theihtawp kan chhuah leh ṭheuh dawn, kan ban phak maiah hlawhtlinna a awm vek avangin tu pawhin an theihnghilh ngai tawh loh tur thil tih kan tum vek dawn a ni," tiin a sawi. Semifinal khel tur pali zingah hian major title la an la awm lo, a tu emaw ber chuan a la dawn.