Benitez-a'n a Napoli chakpui zo lo
Pathianni zan khan Real Madrid nena an sawi zawm mek Rafael Benitez chuan Napoli a enkawl chhunga a match hnuhnung berah a team a chakpui zo lo a, an khelmualah Lazio chu 2-4 in an hneh lo.
Goal luh tamna inkhel
Stadio San Paolo-a inkhelah hian mikhual team an tlangnel a, goal pawh an khung har lo. Minute 33 naah Marco Parolo chuan Lazio tan goal hmahruai a khung a, minute 45 naah Antonio Candreva chuan a rawn chhunzawm ve lehnghal. Goal dang lut tawh lo in chawlhlawk hman a ni a, 2-0 in Lazio-in hma an hruai.
Second half-an ṭan a, Napoli striker Gozalo Higuain a inlar. Argentine striker hian minute 55 leh 64 naah goal rawn khungin Napoli beiseina a chhi nung thar. Mahse, Real Madrid striker hlui hian hat-trick siamna hun ṭha bawhpelin penalty a pet goal lo. Tun season-a goal 28 khung tawhtu striker hian tun season bika vawi sarih penalty a pet tawhah vawi thum chiah a la pet goal.
Lazio-in minute 85 naah Onazi leh minute 90 naah Miroslav Klose hmangin goal an thun leh a, 4-2 in chak zawkah an ṭang ta a ni.
Champions League khel tur Lazio
Serie A-a an match hnuhnung berah an chak zawh loh avangin season thara Napoli-in Champions League an beiseina a tawp zui nghal a, kum 2008 hnua a vawi khat nan Lazio-in Champions League an khel dawn thung.
Inkhel dangah Fiorentina-in 3-0-a Chievo an lo hneh ve avangin Lazio hneha pathumna ni thei tur Napoli-in an chak zawh loh leh Fiorentina chak an tuar a, table-ah panganaah an tla thla. Serie A inkhel dangah Sampdoria leh Parma te chu 2-2 in an inhnehtawk a, Inter Milan-in Empoli 4-3 in an hneh thung.
Benitez-a'n Real a hnaih zel
Pathianni zan inkhelh zawh ruala Napoli manager hna bansan tu Rafael Benitez hi tunhnaia an manager Carlo Ancelotti bantu Real Madrid nen sawi zawm an hlawh hle a, Santiago Bernabeu hi a pan ngei dawn ni pawhin a lang.
Real Madrid vice-president Eduardo Fernandez de Bla chuan Inrinni khan Real fan te nena an intawhkhawmnaah thu sawiin, "Carlo Ancelotti kha coach danglam leh khawvela ṭha ber a ni a, Jose Mourinho pawh kha kum hnih liamta khan chutiang coach chu a ni. Tunah chuan Benitez atan khawvel coach ṭha ber nih hun a inherchhuak ve ta," tiin Benitez-a'n Real a pan tur thu a sawi.