Sporting Lisbon an champion

Pathianni khan Portuguese Cup final khelh a ni a, Sporting Lisbon-in penalty shoot­out hmanga Sporting Braga 3-1 a hnehin an champion.

Final-ah hian minute 15-na a Braga left back Djavan ṭumtu Lisbon defender Cedric Soares-a'n penalty a chawi a, hnawhchhuah a ni bawk.

Braga tan Eder-a'n penalty a khung a, minute 10 hnuah Miguel Lopes hmangin Braga-in goal hnihna an khung leh bawk.

Sporting dinhmun a derthawng a, supporter ṭhenkhat chuan chak beisei tawh loin an haw san. Amaherawhchu minute ruk lek a awm tawh tihin Algeria forward Islam Slimani hmangin Sporting-in goal khat an khung a, injury time-ah Braga defender tihsual zarah Fredy Montero-a'n Lisbon goal hnihna a khung a, 2-2 a ni.

Extra time-ah goal a lut lo a, penalty shoot­out-ah Sporting 3-1 in an chak. Sporting hi Portuguese Cup-a ṭum 16 an champion-na chiah a ni a, Porto nen an champion zat a in ang. Chutihrualin champion ngun ber Benfica tluk turin vawi kaw champion a la ngai thung.

Sporting chakna kawnga player pawi­mawh Nani chuan inkhelh banah, "Tumahin kan thawh leh theih an ring lo. Beiseina kan neih tlat avangin thil harsa tak kha kan thei a ni. Football-ah chuan minute reilote chhungin engkim a danglam vek thei," tiin a sawi.

Manchester United winger Nani hi a lar­chhuahna Sporting Lis­bon-ah loan-in a khel mek.