Algieri hnehtu Khan-a'n Mayweather a cho

Zirtawpni khan British boxer lar Amir Khan chuan welterweight division inhnekah American boxer Chris Algieri a tukdawl a, tun hma aṭanga a lo cho tawh ṭhin Floyd Mayweather hnek a duh thu a sawi leh ta.

New York khawpuia inhnekah hian Khan chuan Algieri hi 117-111, 117-111, 115-113 in a hneh. Kum 28-a upa boxer hi tunhnai a inhnek hnuhnung pangaah a chak fai vek a, vawi 48 inhneka tlawm hmel la hmu lo Mayweather tukdawl turin a inringtawk hle.

Bolton khawchhuak boxer chuan, "Amir Khan hian Mayweather hnek a duh a ni. Chu chu tuna ka duh leh châk ber a ni. Khawvel boxer zinga number one challenger ka ni a, Mayweather hi champion a ni thung. Hei vang hian kan inhnek a ngai a ni," tiin defensive game khelh thiam hmingthang Mayweather chu a cho hle.

Fight of the century tia a hming an vuahah May 2 khan Mayweather hian Manny Pacquiao a lo hneh tawh a, a kum a upat tawh avangin a inhnek hnuhnung ber chu September thlaah neih a tum tawh thu a sawi a ni.

WBO, WBC leh WBA welterweight title kawltu Mayweather hian nikum khan Amir Khan nen inhnekna hun ṭha nei mah se British boxer ai hian Argentina boxer Marcos Maidana hnek a lo thlang tawh zawk a ni.

Hetih lai hian Pathianni zing khan British boxer pahnih Kell Brook leh Frankie Gavin te an inhnek a, IBF welterweight champion lai Brook hian round rukna lekah amah chotu a British pui Gavin hi tukdawlin a title a humhim a ni. He inhnek hi British mi pahnih Welterweight title inchuha an inhnekna hmasa ber niin vawi 36 inhnekah Brook hian tlawm hmel a hmu ta lo.

Pathianni zing Heavyweight boxing-ah British boxer tho Anthony Joshua a che ropui. Kum 25 leka upa boxer hian American boxer Kevin Johnson hneh turin round hnih thleng bak khelh thlen a mamawh lo.

Kum 35-a upa Johnson hian vawi 36 inhnekah hneh loh a la tawng lo a, Heavyweight boxer zinga hming langsar tak tak Vitali Klitschko, Manuel Charr leh Tyson Fury te pawh lo tukdawl tawhtu a ni.

Anthony Joshua promoter Eddie Hearn a phur a, "Joshua hian a hmaa Heavyweight boxer ding apiang chu a tukdawl zel dawn a ni. Britain mipuite hian Heavyweight champion neihna hun ṭha tak kan nei a, i lawm ang u," tiin Joshua chuan bul a la ṭan chauh thu a sawi.