Chelsea angin kan che ve thei lo - Klopp

Premier League champion an ni chungin Liverpool-in nipui transfer-ah player langsar leh lian tham lakluh an la nei lo a, Reds manager Jurgen Klopp chuan Chelsea anga sum tam tak sen tumna a neih loh thu a sawi!

Klopp hian Andy Robertson thachhang dawl turin left back Kostas Tsimikas chu a lalut tawh a, Greek defender lakluh nan hian pound maktaduai 11.7 chiah 

a seng. 

German coach chuan, "Kan tunlai khawvel thlirin thil a chiang lo em em vek a, club ṭhenkhat erawh ram leh thil ti thei tak tak thuhnuaia awm an nih avangin kan khawvel dinhmun chiang lo hian an club-ah nghawng a nei ve 

lem lo. 

"Keini chu club danglam tak kan ni. Kum hnih liam ta khan Champions League final kan lut a, a kum lehah kan champion - a hnuah Premier League nomawi kan chawi leh bawk a, kan club kalphung pangngai zawmin heng zawng zawng hi kan ti vek a ni," a ti. 

Klopp chuan, "Zan khat thil thuah kan nihna hi kan thlak danglam thut thei lo a, Chelsea ang nih duhin che thut thei kan ni lo," tiin a sawi chhunzawm. 

Liverpool hian season hmasa ṭan dawn khan Dutch defender ṭhangduang Sepp van den Berg chu PEC Zwolle aṭangin pound maktaduai 1.3-in an lalut a, goalkeeper Adrian leh Andy Lonergan chu free transfer-a lalutin January khan Red Bull Salzburg forward Takumi Minamino chu pound maktaduai 7.25-in an la lut bawk. 

Reds hian nipui transfer-ah sum an seng tam lo chungin league nomawi an chawi a, anmahni hnaih bertu Manchester City aiin point 18 ngawtin an sang zawk a ni. 

Klopp chuan Covid-19 vanga football-a buai hnua midfielder pahnih Naby Keita leh Curtis Jones  khelh ṭhatna te, Minamino-a'n ngai a awh chhoh te chu transfer bazar-a a chet nat loh chhan niin a sawi bawk. 

German coach chuan, "Kan squad-in hma a sawn hi chu kan duh reng a, mahse a tih dan dang a awm ve ve a ni. Pakhatah chuan player thar lakluh a ni a, a dang lehah chuan thawh ho a, kan ṭhatna laiah hmasawn zel tura beih a, kan ṭhat lohna lai thai bo a ni. 

"Mahse, hei hi football chu a ni. Tumahin training chungchang an sawi duh lo a, player lakluh chungchang chauh an sawi duh," a ti a, a squad neih lai chu season thar hmachhawn tura ṭha tawkah a ngai.