Kolkata club zinga I League champion hmasa ber Mohun Bagan

Mohun Bagan-in I League nomawi an sual chhuak a, India ram football powerhouse ang hiala an sawi ṭhin Kolkata khawpuiin I League ṭan aṭanga kum riatnaah India ram cham­pion club an nei ve ta.

Pathianni zan khan Sree Kanteerava Stadium-ah Ben­ga­luru-in Mohun Bagan an mikhual a, champion lai Ben­galuru tan champion nawn turin chak ngei ngei a ngai. Amah­erawhchu Ashley Westwood hoten minute 41-naa John Johnson-a goal an humhim zo lo a, Kolkata club tana Jeje Lalpekhlua luh hnuah Bagan-in defender Bello Rasaq hmangin minute 87-naah an siphurh a sut a, goal dang luh belh loin 1-1 inkhel a tawp.

Mohun Bagan-in point 39 an hmu a, champion lai Bengaluru khelmualah point khat hlu tak hlawhchhuakin champion thar an ni.

Final chu...

Champion tur zawnna inkhel a nih avangin league match hnuhnung ber a ni nachung­in Bengaluru leh Mohun Bagan inkhel hi 'final' tih a ni.

Mizo tlangval Beingaichho Beikhokhei chu practice-naa a inhliam vangin a inlan thei lo. Heti chung hian India captain Sunil Chhetri chu Bengaluru starting eleven-ah a tel pha lo a, a aiah Sean Rooney leh Robin Singh te kawppui turin Udanta Singh hman a ni.

Manipur forward Udanta a hlauhawm nghal a, box pawn chiaha a freekick hlawhchhuah chu Sean Rooney-a'n a pet over chiang hle.

Bengaluru tan Eugeneson Lyngdoh leh Udanta an khel ṭha a, inkhela chungnung zawk erawh Mohun Bagan an ni. Bagan winger Sony Norde leh Yusa Katsumi te an hmuhnawm a, Bengaluru-in winger pahnih hi an veng uluk a, minute 25 chhungin vawi riat an foul.

Haiti winger Norde-a'n cross­bar a pet per a, counter attack hmangin Bengaluru-in an nawr let a, Eugeneson-a ball tauhin Bagan defender Sehnaj a per hnuah a goal teuh hle. Khasi winger Eugeneson-a'n corner pet nghalin minute 40-naah English defender John Johnson-a'n a tauh lut.

Injury time-ah Norde ball fing tak chu Katsumi-a'n Balwant Singh tan duhthu­samin pe mah se Jeje aia lut Balwant-a'n ball a pet na tawk lo a, John Johnson-a'n a dang. First half-ah Johnson a langsar a, Katsumi veng hnehtu Lalchhuanmawia a hming ṭha a, commentator hming lam ngun ber erawh Bengaluru keeper Lalthuammawia a ni.

Second half-ah ruah a sur nasat avangin tihsual a tam a, inkhela chungnung zawk Bagan tlarhma ten keeper Thuama an patlang thei lo.

Bengaluru forward Robin Singh chu keeper Shilton Paul-a'n ti tlu mah se referee-in penalty a pe lo.

Bagan-in goal an mamawh a, minute 82-naah Balwant aiah Jeje rawn luh tirin an goal bawh a na sawt. Bengaluru-in an bet rei lutuk an tuar a, Dhanachandra Singh ball tauh ṭha tak chu keeper Thuama'n a dang ṭha mah se corner dang erawh Bengaluru-in an dawl ta bik lo. Defender marking ṭhat loh zarah Nigerian defender Bello Razaq chuan a tauh lut a, 1-1 a ni.

Bengaluru-in vanneih beiseiin Sunil Chettri an luh tir a, Eugeneson corner leh freekick hmangin Bagan tlarhnung rum ṭhaih mah se goal a lut tawh lo. Mohun Bagan chu I League champion an ni.