Europa League khel tur Southampton
Southampton-in kum 12 hnua a vawi khatna atan season tharah Europa League an khel ang.
Inrinni zanah Arsenal-in FA Cup final-ah Aston Villa 4-0 in an hneh a. Arsene Wenger hoten UEFA Champions League an khelh dawn avangin Premier League pasarihnaa awm Saints an vannei ta a ni. Aston Villa kha chak se chuan Tim Sherwood hote khan season tharah Europa League an khel ang.
Saints hian 2003-04 season khan UEFA Cup an khel a, khami ṭum khan first round-ah Romanian club Steaua Bucharest chu aggregate-ah 2-1 in an hneh lo.
Ronald Koeman-a team hian Europa League - third qualifying round stage an khel ang a, inelna pangngai thleng turin two legged matches ṭum hnih an chak a ngai a, chumi awmzia club pahnih an hneh phawt a ngai tihna a ni.
Saints midfielder James Ward-Prowse chuan, "Arsenal kan lawm e. Saints-in Europe kan pan dawn ta," tiin twitter-ah a ziak.
2015-16 season Premier League hi August 8 a ṭan tur a ni a, Southampton hian third qualifying round first leg chu July 30-ah an khel ang a, August 6-ah second leg an khel leh ang.
Premier League aṭangin Chelsea, Manchester City, Arsenal leh Manchester United ten UCL an khel dawn a, Tottenham, Liverpool, Southampton leh West Ham (Fair Play) ten Europa League an khel ang.