FRENCH OPEN Khawtual tlangvalin quarterfinal a lut

Kum li chhunga a vawi thum nan Jo-Wilfried Tsonga chuan French Open quarterfinal a lut leh ta. Tsonga hi kum tinin champion beisei awm ber pawl ni ṭhin mah se nomawi a la chawi ngai lo.

Seeded 13-na Tsonga hian quarterfinal lut turin Pathianni khan Tomas Berdych chu 6-3, 6-2, 6-7(5), 6-3 in a hneh hram. Kum 2013 khan Tsonga hian semifinal a luh tawk bakah kum 2012 khan quarterfinal a in vaw kai tawh bawk.

French hmeichhe tennis star hming chawia an sak Suzanne Lenglen court-a inkhelah hian khawtual tlangval Tsonga hian set hmasa pahinh chu awlsam takin la mah se set thumna aṭangin Berdych-a'n thapui a rawn thawh ve a, 6-7(5) a set thumna a lak hnuah set li naaah pawh 3-1 in hma a hruai chhunzawm leh thei. Mahse Tsanga hian a zawna game nga rawn laiin 3-3 in set hnuhnung ber a la zui. Hnehna chang turin Tsonga hian darkar thum dawn a mamawh a ni.

Tsonga hian quarterfinal-ah 6-3, 6-4, 6-2 a Teymuraz Gabashvili hnehtu Japanese seeded pangana Kei Nishikori nen an inhmachhawn leh ang.

Kum 30-a upa Tsonga chuan, "He hmunah hian kum 2012 leh 2013 khan uiawm takin ka lo tawp tawh a, kuminah erawh mipui rin ber ni ve chiah lo mah ila champion theih ka ni ve tho tih ka inhriat avangin a tawp thlengin ka bei dawn a ni," tiin an ramah champion a tum.

Inkhel dangah seeded pa riatna Stanislas Wawrinka a che ṭha chhunzawm zel a, set khat mah hloh loin Gilles Simon chu 6-1, 6-4, 6-2 a hnehin quarterfinal a in vaw tling bawk. Wawrinka hian set khatna leh set thumnaah Simon-a service hi vawi hnih a chhuhsak ve ve. Set hnihnaah hian game li ve ve an lak laiin hun pawimawhah Wawrinka hian Simon a service chu vawi khat a chhuhsak bawk.

Philippe Chatrier court-ah Roger Federer leh Gael Monfils te inkhelh laiin light a ṭhat loh avangin set thumna an khelh hmain tih tawp a ni. Federer leh Monfils hian set khat ve ve la tawhin nizan khan set thumna aṭangin an khelh chhunzawm a, result erawh kan hre hman ta lo.

Hmeichhe lamah kum 2008 champion Ana Ivanovic chuan a vawi hnih nan champion a tum a ni tih lantirin Ekaterina Makarova chu inkhel inhnehtawk takah 7-5, 3-6, 6-1 in a hneh a, quarterfinal a in vaw kai bawk.