Raptors an la tlawm lo

NBA Eastern Confe-rence semifinal khelh laiah Toronto Raptors an la tlawm bik lo. Nimin zing game 6 inkhelah Raptors hian Boston Celtics chu 125-122 in an hneh a, series-ah 3-3 a ni chiah - Inrinni zing dar 6:30-ah a tlang tur zawk an chingfel ang.

Advent Health Arena-a inkhelah Raptors tan Kyle Lowry-a'n point 33 hlawhchhuakin team tan a thawhhlawk hle. Ani bakah hian bench aṭanga lut Norman Powell (23 points) leh Fred VanVleet (21) te chu an chakna hnar pawimawh an ni bawk.

Playoff chin hi best of seven series hmanga khelh a ni a, chak tur chuan a tlem berah game li lak tlin a ngai. An intawn leh huna chak zawk an tlang ang, a chak zawk hian Miami Heat nen Eastern Conference final an khel leh dawn a ni.

Lowry chuan, "Chak lo ni ila chuan kan zinkawng a tawp dawn tih ka hre vek, boruak sang leh harsa tak karah rilru fim taka kan khelh theih bakah, player zawng zawngin theihtawp kan chhuah avangin kan chak. Tunah chuan game 7 khel turin kan inpeih," a ti.

Western Conference semifinal lamah Kawhi Leonard awmna Los Angeles Clippers chuan Denver Nuggets 96-85 in an hneh, series-ah Clippers hian 3-1 in hma an hruai ta; tlang turin vawi khat chak chauh an mamawh tawh.