Women World Cup final Blatter-a'n a en dawn

FIFA president Sepp Blatter chuan tun thlaa Canada-a Women World Cup final khelh tur en ngei a tum a, tunhnaiah eiruk thubuai vangin FIFA buai viau mah se buaina hi zin sanin Canada lam pan a tum nia sawi a ni.

Hetih lai hian FIFA general secretary Jerome Valcke chuan Women World Cup ṭawiawm tura a kal theih loh tur thu a sawi thung.

Valcke hian Thawhṭanni khan June 6-a ṭan tur tournament hi a chhim theih loh tur thu a tichiang a, FIFA thuchhuak chuan, "FIFA headquarters'-ah buaina tam tak chin fel tur a awm a, Zurich-a kan headquarters-a a awm ngei hi a pawimawh hle a ni," a ti.

FIFA buaina

Tunhnaiah khawvel huap football chunga thuneitu sang ber FIFA hi eiruk thubuai vangin a hmingchhe nasa hle a, kar hmasa lawka FIFA official pasarih lai man an nih hnu phei chuan an hmingchhiatna hi a nasa lehzual. An mi man te hi dik lo taka sum hman, eiruk, thamna sum buaipui chungchangahte thubuai siamsak an ni nghe nghe.

FIFA official ṭhen­khatte eiruk thubuai siamsaktu hi US Depart­ment of Justice niin thuchhuah an siam hnu lawk hian Swiss Court lam pawn thuchhuak an nei ve lehnghal a, kum 2018 Qatar World Cup leh 2022 Russia World Cup thlen dan chungchangah thil fel lo a awm nia ngaiin FIFA chu chhuichian turin an ti a ni.

Blatter a president na hnuaia FIFA a hming­chhiat em avang hian kar hmasa Zirtawpnia president thlan tharna neih a nih hma khan khawvel ram hrang hrang football hruaitute leh ram hruaitu ṭhenkhan chuan Blatter hi president a nihna bansan turin an lo nawr tawh a, mahse bang duh lo in president hi a chuh nawn leh a, a tling leh ta tho a ni.

Hruaitu ṭhenkhat hrem

Tunhnaia FIFA hruaitu ṭhenkhat eiruk thubuai siamsak an nih avang hian FIFA pawh a fimkhur lehzual a, hruaitu ṭhenkhat chu an hrem hial. FIFA-in a hrem zingah CONCACAF general secretary Enrique Sanz te, Congolese Foot­ball Association vice-president Jean Guy Blaise Mayolas leh gene­ral secretary Badji Mombo Wantete te chu hming langsar zual an ni.

Hetihlai hian Brazil football hruaitu lu ṭhin Ricardo Teixeira chu eiruk thubuai vangin Brazil court-in a chhui mek a, amah thlaktu Jose Maria Marin chu FIFA offical pasarih man zingah khan a tel bawk.

Paraguay court chuan South American Football Confederation president hlui Nicolas Leoz manna thupek an chhuah bawk a ni.