Kolkata mipuiin Bagan an hmuak ropui
Mohun Bagan-in Thawhṭanni khan Kolkata an thleng a, I League champion hmuaktu hi mipui nuai 10 bawr vel niin Mizoram mipui zat zet a ni.
Mizo tlangval Jeje Lalpekhlua chuan, "Airport aṭanga club ground thlen nan darkar li zet kan hmang. Mipui an tam lutuk a, min chim nasa hle. Security-in min veng hneh lo a, ven hneh ngaihna pawh a awm lo," tiin mipui tam zia a sawi.
Pathianni zan khan Nigerian defender Bello Rasaq khan goal khung lo se chuan Airport aṭanga Mohun Bagan ground kal nan Jeje leh a teammate-te hian darkar khat chauh an hmang ang. Mohun Bagan hian Bengaluru an draw vangin 2014-15 season I League champion an ni.
Mohun Bagan forward Jeje chuan sawi chhunzawmin, "Ṭhenkhat an ṭap a, ṭhenkhatin min kuah mai duh tawk loin fawhte an tum a, khawlum nen a inmil lo khawp mai. Mahse lawm vang vek a ni. Mipui bakah official zawng zawng nen kan lawm tlang a ni ber mai. Club ṭantu khatiang zat kha an pungkhawm ang tih ngaihna ka hre lo, a ropui lutuk a, ka sawi thiam lo a ni," a ti.
Hnahthial tlangval chuan sawi zelin, "Airport aṭanga club ground thleng thirsakawr hmanga min zui thleng ṭhakte an awm a, khua a lum si a, an hah ve khawp ang. A taka han tawn chiah chuan Kolkata-a football an atchilh dan hi chu a ropui deuh chu a ni," tiin football powerhouse hminglem an vuah Kolkata khawpui chu a fak hle.
Kolkata club danglamna sawi zuiin Jeje chuan, "I League-ah hian state dang club tana goal thum khung aiin Kolkata club tana goal khat khung hi a langsar zawkin ka hria. Chu chauh mai pawh a ni lo, Kolkata League-a goal khung ringawt pawh hi hlu tak a ni. Goan club-te pawh an ṭha a, mahse Kolkata-a football an anchilh dan hi chu a mak a, Kolkata club tana khelh hi pressure a tam bik a ni," tiin a sawi.
Mohun Bagan champion hian nghawng lian tak a nei nghal a, an hmelma East Bengal-in harhtharhna an chang. East Bengal hian Bagan hi pawn lang takin an lawmpui a, season tharah champion ngei tumin team ṭha zawk din an tum.
2015/16 season-ah Kolkata Derby boruak a lian dawn a, chu boruak tem pha tur chuan Aizawl FC an tel dawn. I League ṭan aṭanga kum riatnaah Kolkata club an champion a, kum kuanaah Mizoram Premier League club an tel ve chiah ang.