Palina ni loin champion kan duh - Carrick

Manchester United midfielder Michael Carrick chuan season zo ta a thlir let a, an result chu duhthusam a nih loh thu a sawi chhuak.

Inhliam vanga season hmang tluan thei lo Carrick chuan, "Chetṭhat leh chetchhiat a inchhawk a, player thar kan lak luh zarah team ṭha zawk kan ni. Uluk taka thlirin palina nih hi result pangngai tak a ni a, amaherawhchu lawmna tham a ni lo. Season tharah chuan lawm tlak result kan neih tawh ngei ka beisei," tiin champion a duhthu a sawi.

English midfielder Carrick chuan, "Cham­pions League khelh phak hi hlawhlinna chu a ni ngei a, result ropui erawh a ni lo. 2013/14 season-a pasarihna kan nih vangin palina nih a hlu lehzual a, mah se United tan chuan lawmna tur a ni lo. Ka tan chuan season hrehawm tak a ni a, hetiang renga inhliamna nasat hi ka nei ngai lo," tiin a khel tam thei lo chu pawi a tih thu a sawi.

Louis Van Gaal hnuaia khelh nuam a tih thu sawiin Carrick chuan, "A bulah awm nuam ka ti khawp mai. A tir thla thum chhung ka khelh theih loh khan min rawn tlawh a, 'Inhliam vangin rilru ti hah suh, i dam ṭhat kha a pawimawh ber' tiin min fuih a, ka thlamuan phah hle. Football khawvelah dai chin a ngah tawh a, thil tam tak a thlir tel avangin team chuan kan hlawkpui khawpin ka hria," tiin Dutch manager a fak.

Kum 33-a upa Ca­rrick chuan "Kumin leh kum hmasa lama kan supporter-te chet danah ka lawm takzet a ni. Champion team ṭan hi chu a har lo a, result ṭha neih loh lai hian supporter-ten an zia tak tak an chhuah a, engtik lai pawhin min ṭawiawm ṭha em em a ni. Season tharah chuan auhna tur tam zawk kan pek theih ngei ka beisei," tiin supporter te a fak.