Arsenal-in hlawhtling turin eng nge an mamawh?

A zawnin FA Cup champion nomawi an chawi a, an elpui club ṭha dangte el phak rual lohin vawi 12 zet an champion ta. Mahse, hlawhtling lehzual tur chuan Arsenal hian mamawh an nei tih chu beng neiin an hriat tluk zetin mit nei chuan an hmu thiam ang.

Kum 1996-a Arsene Wenger-a'n a enkawl aṭang khan Gunners hian hlawhtlinna tam tak an lo chang tawh a, chung zingah chuan Premier League vawi thum, FA Cup vawi ruk bakah FA Community Shield vawi ruk an chawi tawh bawk.

Wenger hian kum 19 Arsenal a enkawl chhungin hnuhma nei ṭha hle mah se hlawhtling lehzual tur chuan hmabak ala nei ve tho niin a lang. An tum leh duh ber pakhat Premier League-ah kum 11 chhung zet an champion tawh loh bakah Europe-ah phei chuan English club ṭha dangte chu sawi loh ram dang club te pawh an el pha lo hle a ni.

Tun season hman zawh takah pawh khan beiseina sang tak nen champion tum ve mah se Premier League-ah champion Chelsea chu point 12 zeta an phak loh bakah Champions League aṭangin Monaco-in an pet chhuak bawk. EPL leh Europe a hlawhtling turin Arse­nal-in eng nge an mamawh ni ta ang?

Striker thar?

French manger Wenger-a'n kum 2012 khan hnampui Olivier Giroud chu striker rinrawl ni turin a la lut. Giroud hian Gunners tan match 97 a khelh

aṭangin goal 41 a khung thei a, a chhe lem lo. Tun season liamtaah pawh khan match 35 aṭangin goal 18 a khung. Giroud bakah hian Arsenal hian Danny Welbeck an nei . Anni pahnih hi player ṭha leh ṭangkai tak ni mah se inelna lian thama champion pui tham an ni em tih erawh chhut fe tham a awm ang.

Season ṭan dawna Barcelona aṭanga an lakluh Alexis Sanchez hi a thiamin khel a ṭha ṭhin hle, a season khatnaah pawh a club tan goal 25 a khung nghal thei. Mahse Sanchez hi winger ṭha tak chu a ni ngeia, striker rinrawla neih chi player chu a niin a lang lo.

Barcelona super star Lionel Messi leh Real Madrid star Cristiano Ronaldo te ang em an nei thei lo a nih pawhin hlawhtling leh zual tur chuan Sergio Aguero emaw Diego Costa ang tiat tal striker hi chu an mamawh niin a lang. Tun dinhmunah chuan Gunners hian Thierry Henry thlak zo an la nei lo.

Midfield phui ṭha

Arsenal-in Premier League an chawi kum 1997/98, 2001/02 leh 2003/04 te kha kan thlir kir chuan midfield-ah ro an rel ṭhin tih kan hmu ang. Goal khung tura an tlarhmate an puih ṭhat bakah an tlarhnung kha midfield aṭanga phui ṭan a ni tih kan la hre vek awm e.

An champion hmasak pahnih 1997-98, 2001-02-ah khan Patrick Vieira leh Emanuel Petit te inkhawp thawhhlawk zia leh kum 2003-04 a Wenger-a'n 'The Invincibles' team a din ṭuma Viera leh Gilberto Silva te thawh hlawk zia kha kan hria.

Tuna Arsenal midfielder te hi kan en chuan ṭha leh ball thiam tak tak vek an ni. Goal nawr tur chuan Mesut Ozil leh Santi Cazorla te aia thlan tur dang hi an awm bik lo pawh a ni thei. Mahse, an tlar hnung pui tura an rinrawl Francis Coquelin kawppui tur

ṭha hi an mamawh chu niin a lang bawk. Mathieu Flamini leh Mikel Arteta te hi chuan tun aia sang hi an thlen pui dawn vak lo nia alan avangin Wenger hian defensive midfielder khawng ṭha tak a mamawh hle.

Plan B

An khelh fuh laklawh ni chuan North London club hi dan ngaihna awm lo khawp a hlauhawm an ni ṭhin. FA Cup champion tur a Manchester United an khelmual Old Trafford-ah ngei an va hneh dante, Premier League-a an elpui Manchester City Etihad Stadium-a an va hneh dante ngaihtuah chuan team ṭha an nih tih phat rual a ni lo.

Amaherawhchu, an chet fuh loh leh chet sual chang tam lutuk te leh Chelsea manger Jose Mourinho an ngam lo tlatte hi an champion na kawng daltu lian tak a ni chiang.

Tun season championship inum boruak san lai tak pawh khan Mourinho khan 'Boring Chelsea' hmangin Wenger hi a hneh thei. Goal ven thiam Mourinho-a'n goal a venghim thei anih chuan chak turin goal thun thiam Wenger-a'n goal khung turin a naute a rem fuh a hun tawh a ni.

French manager Wenger hian Portuguse manager Mourinho hi vawi khat mah ala hneh ngai lo. Ram khata awm, League khata khel leh champion tum ve ve an nih avangin hneh theih loh nei chunga champion chu a harsa hlein a rinawm. League-ah champion a duh a nih chuan he record ṭha lo tak hi Wenger hian a thai bo a hun tawh.