Bundesliga khel chhunzawm tur Hamburger SV
Hamburger SV-in injury time-a Marcelo Diaz freekick hmangin Karlsruhe laka an siphurh an sut a, extra time-a Nicolai Muller goal hmangin aggregate-ah 3-2 in an chak. Hamburg hian season tharah Bundesliga an khel zel ang.
German champion ṭum thum ni tawh Hamburg hi kum 1963-a Bundesliga din tirh aṭanga la relegate lo awmchhun an ni.
German league kalphung
Bundesliga-ah team 18 an awm a, season tawpa table mawng pahnih club an relegate. Table-a 16-naa awm club-in Bundesliga khelh chhunzawm zel turin 2.Bundesliga-a pathumna nen double legged playoff an khelh an ngai thung.
Playoff chu
Tun season-ah Freiburg leh Paderborn an relegate a, Ingolstadt leh Darmstadt te an tling thar. Bundesliga hmun ruak pakhat chu 16-naa awm Hamburg leh 2.Bundesliga-a pathumna Karlsruher ten an inchuh.
May 29 khan Hamburg khelmual Imtech Arena-ah first leg khelh a ni a, Karlsruher-in Rouwen Hennings hmangin minute lina lekah goal kung hmasa mah se Hamburg-in minute 73-naa Ivo Ilicevic hmangin an sut. 1-1 in inkhel a tawp.
Thawhṭanni khan Wildparkstadion-ah second leg khelh a ni a, Karlsruher-in Bungesliga in petling turin goal khung ngei ngei an mamawh.
Away goal nei Hamburg-in bul an ṭan ṭha a, minute 10 chhung lekin goal-ah vawi ruk an pet hman a, Karlsruher keeper Dirk Orlishausen tana harsa tur erawh vawi khat chiah a awm.
Team pahnihin goal khungna chance nei ve ve a, goal erawh a lut lawk lo. Minute 78-naah first leg-a Karlsruher tana goal khungtu Hennings-a pass chu substitute Reinhold Yabo-a'n goal-ah a chantir a, aggregate-ah 2-1 a ni.
Vanneihna chu
Minute 90 a nih thleng pawhin Hamburg-in goal an khung thei lo a, injury time minute khatnaah Marcelo Diaz freekick hmangin an siphurh an sut a. Away goal rule a hman theih loh avangin extra time khelh a ni.
Extra time tawp hma minute nganaah Muller-a'n Hamburg tan goal pawimawh khung a, Hamburg erawh an la him mai lo. Hun tawp hma chiahin Karlsruhe-in penalty an hmu a, Hennings-a penalty pet chu Hamburg keeper Rene Adler-a'n a dang. Goal se chuan Karlsruche hi away goal rule hmangin an chak ang.
Final whistle a ri a, Bundesliga khel chhunzawm turin Hamburg an him hram.
Eng nge an sawi?
Hamburg chak puitu keeper Adler chuan, "Duthlan theih chu nise hetiang ang game pressure sang lutuk hmachhawn loh hi ka duh. A tawpah team chhanhim mah ila, kan hlawhtlinna erawh team pumpui thawhrah a ni. Kan hun tawn kha a ropui lutuk a, ngai ka awh lawk lo ang," tiin a sawi.
Hamburg head coach Bruno Labbadia chuan, "Ka lawmzia hi thuin ka dah thiam lo. He khawpui hi ka hmangaih a, club hi ka hmangaih a ni. Club ka enkawl tirh khan table mawngphaha an awm avangin Hamburg chhanhim hi a harsa dawn tih ka hria. Tunah chuan kan tum kan hlen a, tunhnai kar ruk chhunga team thawhrimna rah a ni," tiin Bundesliga an khelh chhunzawm dawn avangin a lawm takzet.