Terry thu a awih loh vanga inchhir Bosnich

Chelsea keeper hlui Mark Bosnich chuan a hunlai khan John Terry-a thurawn lo pawm se chuan tun aia rei zawk football a khelh a rin thu sawiin damdawi vanga a buai a rin loh thu a sawi.

Australia interna­tional goalkeeper hlui Bosnich hian January 2001-ah Chelsea hi a pan a, damdawi hman phal loh a lo hman avangin thla kaw chhung football kaihhnawih thila inhnamhnawih lo turin hrem a ni a, Chelsea hian a contract tihtawpsak ve nghalin September 2002 thleng Chelsea-ah hian a cham a ni.

Manchester United leh Aston Villa keeper hlui chuan, "Khatih hun­laia kum 21 lek mi John Terry khan ṭhian ṭha lo zinga ka awm tam thu min hrilh a, engahmah ka ngaihsak lo. Terry-a min zilhna kha lo ngai­pawimawh ni ila chuan rei zawk football kha ka khel thei ang," tiin Terry-a thurawn a lo pawm lo chu a inchhir hle.

Kum 43-a upa Bos­nich leh Terry te hi Pathianni khan Sydney FC leh Chelsea te'n friendly match an khelh hmain kum 13 hnua a vawi khat nan an inhmu leh a ni.