Atletico tana khelh chak Vietto

Villarreal striker Luciano Vietto chuan a man zat atana a club khelh mekna in an bi tuk zata amah duhtu Atletico Madrid-in an lei ngam a nih chuan tu tan pawha lungawi tlan vek theihna tur ber nia a hriat thu a sawi.

Kum 21-a upa striker hi season hman liam takah khan Villarreal tan a che ṭha hle a, La Liga-ah phei chuan club top scorer niin goal 12 lai a khung a, a khelh ṭhat em avangin Atletico Madrid nen hian sawi zawm a ni.

Argentine striker chuan, "Ka hmalam hun engmah ka sawi chiang thei lo a, tun dinhmunah chuan ka rilru hi Villarreal-ah a awm mek. Mahse Atletico hian ka club-in chhuah min phalsakna zat euro maktaduai 20 vel an rawn keng a nih chuan ka chhungte leh ka agent te ka rawn ve leh phawt ang. Ka tana ṭha tur ber anga kan hriatin thutlukna siam kan tum dawn a, ka ngaihdan chuan ka club-in min chhiarna ang zata Atletico-in min lei ngam a nih chuan tu tan pawh hlawkna a ni ang," tiin Vicente Calderon-a kal a châk thu a sawi lang zauh.

Vieto chuan, "Sea­son tawp lamah ka hnung­zanga hliam awm avangin ka khel ṭha thei lo. Media lam chuan club dang ngaihtuah vanga khel ṭha loah min puh a, mah se thu dik lo a ni," tiin media lam puhna chu a pha.