FRENCH OPEN Rafael Nadal hmaa ding tur Novak Djokovic

May 24 aṭang khelh ṭan French Open 2015 a hmawr bawk a lo hnai leh ta. Mipa lamah player langsar leh chak tura rinkai te an chak zel a, hmeichhe lamah erawh champion lai Maria Sharapova chu quarterfinal thleng zo loin a tla thung. Khawvelin a hmuh chak leh nghahhleh chu Rafael Nadal leh Novak Djokovic te inhmachhawn tur hi a ni.

Champion lai Nadal, Djokovoc, Roger Federer, Stanislas Wawrinka, Andy Murray, Jo-Wilfried Tsonga leh Japanese Kei Nishikori te chuan quarterfinal an lut.

Roland Gaross-a a vawi 70 chakna ni turin Rafael Nadal chuan 6-3, 6-1, 5-7, 6-2 in Jack Sock a hneh a, quarterfinal a inhlangkai. Semifinal thleng turin World number 1 Novak Djokovic nen an inhmachhawn leh ang.

Quarterfinal inhlangkai turin Djokovic chuan Richard Gasquet chu straight set-in a hneh. Last 16 inkhelah hian Djokovic hian inkhel a thunun hneh hle a, awlsam takin game nga chauh hloh chungin 6-1, 6-2, 6-3 in a chak a ni.

Set thumnaah talbuai deuh mah se Britain Andy Murray a buai reng lo, seeded pathumna Murray chuan darkar hnih leh minute 51 chhung in khawtual tlangval Jeremy Chardy chu 6-4, 3-6, 6-3, 6-2 in a hneh.

Nadal Vs Djokovic

Khawvel tennis palyer piang tawh zawng zawng ten an la tih theih loh Grand Slam pakhata vawi 10 champion nih tum mek Nadal hian a thil tum ti hlawh tling tur chuah zanin hian quarter final-ahDjokovic a hneh a ngai dawn.

French Open bika an sulhnu kan thlir chuan Nadal hi a chungnung hle a, vawi ruk an inhmachhawn tawhah chak zawkah ala ṭang fai vek. Mahse, tun season-ah Nadal-a'n beisei angin a khel ṭha tawk lo a, champion nomawi pakhat chauh ala chawi laiin Djokovic hi a zawnin match 26 a chak zawn tawh thung. Serbian star Djokovic hi tun kum a ATP masters pathum ah a champion zawn nghe nghe a ni.

Kum 29 a upa Nadal chuan an inkhelh tur thlir lawkin, "Final ala ni lo tih chu ka hria, mahse final aiin a nep dawn lo. Tunlai khawvelah chuan Djokovic hi player ṭha leh hlauhawm berte zinga ami a nih avangin a hautak hle ang. Ka taksaah harsatna ka neih loh avangin ka zam lo a, chak ngei turin ka inring tawk hle a ni," tiin a sawi. Nadal hi French Open champion tam ber ni mekin vawi kua a champion tawh.

World number 1 Djokovic chuan a khingpui tur Nadal chungchang sawiin, "Clay court-ah chuan Rafa aia ṭha an awm lo tih hi mi zawng zawngin an hre vek ang. Ani nena clay-a inkhelh hi ka tan chuan chona hautak ber pawl a ni reng a ni. Mahse, ka zam lo a, chak turin ka ṭhat tawk avangin ka inring tawk a ni," tiin French Open final-a vawi hnih a hneh loh tawh Nadal hneh theih a inbeisei hle.

Nadal leh Djokovic hi inelna hrang hrangah vawi 43 an inhmachhawn tawh a, Nadal chak tam zawkin vawi 23 a chak tawh a, Djokovic hi vawi 20 a chak thung.

Federer a tlo

Philippe Chatrier court a Roger Federer leh Gael Monfils te inkhel chu ruah surin a tih khawtlai bakah light ṭhat loh avangin set khat ve ve an la hman tihin tihtawp a ni. Set thum khelh bang an neih hi Thawhṭanni tlai khan khelh chhunzawm niin Federer hian 6-4, 6-1 a set hnih la zawnin hnehna a chang. An inkhel hmasa nen belhkhawmin 6-3, 4-6, 6-4, 6-1 in World number 2 hi a chak a ni.

Mipa quarterfinal match hmasa berah World number 2 Federer leh Stanislas Wawrinka te an inkhel a, result erawh kan hre hman lo.

Hmeichhe

champion a tla

Champion lai leh champion leh tura beisei awm berte zinga ami Maria Sharapova chu last 16-ah a khingpui seeded 13 na Lucie Safarova hneh loin a tla. A vawi ruk nan Grand Slam nomawi chawi tum mah se Sharapova hian a tum ram a thleng zo ta lo a ni. Kum 2010 hnu lama quaterfinal thleng lova a tlak vawi khatna a ni.

A vawi khat nana quarter final lut turin Safarova hian 7-6, 6-4 in Russian star hi a hneh a ni. Lucie Safarova hian Flavia Pennetta hnehtu Garbine Muguruza chu a hmachhawn leh ang.

Hmeichhe World number 1 Serena Williams chuan vawi 15 zet unforced error a nei chungin world number 40 Sloane Stephens chu 1-6, 7-5, 6-3 in a hneh.

Vawi 19 zet Grand Slam champion ni tawh Williams chuan,"Ka beidawng ve ngai lo tih chu vawiin khan a lang chiang hle awm e. Set khatnaah khan game khat chiah ka la ve thei a, mahse beidawng lova ka beih let ṭang ṭangna rah ka seng a ni," tiin a beidawn duh loh vanga chak a nih thu a sawi. Williams hian kum 2002 leh 2013 Roland Gaross champion nomawi a lo chawi tawh a ni.

Mipa quarterfinal fixture

Federer Vs Wawrinka

Tsonga Vs Nishikori

Nadal Vs Djokovic

Murray Vs Ferrer