Chawlh hahdam tum Jurgen Klopp

Borussia Dortmund coach kalchhuak Jurgen Klopp chuan coaching hna a thawh rih loh tur thu sawiin chawlh hahdam a duh thu a sawi.

Kum 47-a upa coach hi Dortmund a chhuahsan tur thu a puan hnuin Liverpool nen sawizawm ni mah se Reds hi pan a tum hmel rih lo hle.

German coach chuan, "Kum sarih chhung zet rim takin hna ka lo thawk tawh a, ka hun tawn lunglenthlak leh hlimawm takte kha tun atan chuan hahdam taka thlir let hi ṭha rih berin ka hria. Chu chu chona thar hmachhawn tura inbuatsaih ai chuan tun atan chuan a ṭha rih zawk a ni," a ti.

Inrinni zan khan Klopp hian Borussia Dortmund a enkawl hnuhnun berna hun hmangin German Cup final-ah 1-3 in Wolfsburg lakah an tlawm a ni.

Kum sarih Dortmund a enkawl chhunga Bun­desliga title vawi hnih chawi pui theitu hian April thlaa Signal Iduna Park-a chhuahsan tur thu a puan khan chawlh lamin a rilru a luah loh thu sawiin, "Ka hah em vang emaw, chawlh lawk ka duh vang emaw a Dortmund hi chawlhsan tur ka ni lo, he club tana ṭha tawk lo ni a ka inrhiat hun hun chu ka chhuah hun tur a nih thu ka lo sawi tawh ṭhin a ni," tiin a sawi a, mahse a hun a thlen meuh chuan chawlh hahdam mamawh nia a inhriat thu a sawi leh ta si a ni.

Kum 2013 Champions League final-a Dortmund hruai thlengtu coach hi amah ang tho a Mainz manager hlui Thomas Tuchel chuan a thlak dawn a ni.