Monaco chhuahsantu Dimitar Berbatov

French club AS Monaco chuan an striker Dimitar Berbatov chu a contract a zawh tawh avangin an chhuah zalen thu an puang.

Kum 34-a upa striker hian January 2014 khan AS Monaco hi a zawm a, season hman zawh takah khan Monaco tan league match 26 khelin goal sarih a khung a ni. Champions League last-16 aṭanga Arsenal an hnawhchhuah ṭumin goal a khung nghe nghe.

Manchester United leh Tottenham hotspurs striker hlui hi Premier League club ṭhenkhat nen sawi zawm an ni nghal a, amah hnaih ber tu chu season thar aṭanga Premier League khel tur Championship champion Bournemouth nia sawi a ni.

Monaco hian Fulham aṭanga loan-a an hawh goalkeeper Maarten Stekelenburg pawh an chhuah zalen thu sawiin a ngheta lakluh theihna dan nei mah se Fulham lama kir tir leh mai hi an thlang ta zawk a ni.