Dnipro hrem an ni

Ukarainian club Dnipro Dnipropetrovsk chu semifinal a Napoli an hneh ṭuma an fan-te field chhunga an tlan luh nasat avangin Europe khawmualpuia football thuneitu sang ber UEFA chuan a hrem a, European competition-a an home game hmasa ber chu mipui en theih loh a khelh tur a nih bakah euro 70,000 chawi tura hrem an ni.

Dnipro hian Europe semi-final second leg-ah 1-0 a hnehna changin inkhel pahnih belhkhawm­ah Napoli chu 2-1 in an hneh a, an club chanchina a vawi khat nan European competition final an lut. Mahse, inkhel zawh lam­ah field chhungah fan-te tlan lutin, halmawi an hal bakah vunrawng vanga inhmuhsitna banner stadium chhunga an tarlan vangte in hremna hi an tawrh a ngai ta a ni.

Ukraine club Dnipro hi Ukrainian League-ah pathumna niin season tharah Europa League an khel leh dawn a ni.