Liverpool leh Milner inrem hnai

Manchester City midfielder James Milner leh Liverpool te chuan tun kar tawp hian inbiakna neih an tum a, inbiakna hi a kaltluang a nih chuan Milner hian free transfer-in Liverpool hi a zawm thei dawn a ni.

June thla tawpa Manchester City-a a contract neihlai hmang zo tur Milner hi season tawp hma aṭang khan Liverpool lam hian an lo thli thlai tawh a, ruahman anga thil a kaltluang a nih chuan July 1-ah Liverpool hi a zawm ang.

Kum 29-a upa English midfielder hian a naupan lai aṭanga a ṭan em em Leeds United-ah bul ṭanin November 10, 2002 khan West Ham nen an inkhelh ṭumin a senior game hmasa ber a khel a, kum 16 leh ni 309 leka upa niin Premier League chanchin a Premier League match khel thei naupang ber dawttu a ni.

Kum 2002 vek hian Sunderland 2-1 a an hneh ṭumin goal a khung a, kum 16 leh ni 356 a upa nichungin Premier League-a pet goal thei naupang ber record a siam. A record duhawm tak hi Everton rawlthar James Vaughan chuan 2005 khan a khum a ni.

Milner hian Elland Road chhuahsan hreh viau mah se kum 2004 khan Leeds United tlakchhiat vangin Newcastle United a zawm a, Magpies aṭang hian Aston Villa zawm lehin kum khat hnuah pound maktaduai 26 sengin Manchester City-in an lalut a ni.

England international hian Etihad-a a cham chhungin Premier League title vawi hnih leh FA Cup vawi khat a chawi hman a ni.